कष्टकरी बापाची कहाणी! ‘घोडा’च्या ट्रेलरची सोशल मीडियावर चर्चा

मुंबई: आई-लेक, बाप-लेक या नात्यांवर आजवर अनेक सिनेमे आलेत. मुलगा आणि वडिलांच्या नात्याबद्दल मात्र फार कमी बोललं जातं. याच बाप लेकाच्या नात्यावर आधारित एक मराठी सिनेमा लवकरच प्रेक्षकांच्या भेटीला येत आहे. ‘घोडा’ असं या सिनेमाचं नाव आहे.

मुलाची इच्छा पूर्ण करण्यासाठी, अहोरात्र मेहनत करून धडपडणाऱ्या वडिलांची, वडील-मुलाच्या नात्याची विलक्षण गोष्ट ‘घोडा’या चित्रपटातून प्रेक्षकांसमोर येणार आहे. अनेक महोत्सवांमध्ये कौतुक झालेला हा चित्रपट १७ फेब्रुवारीला सर्वत्र प्रदर्शित होणार असून, या चित्रपटाचा ट्रेलर नुकताच सोशल मीडियावर लाँच करण्यात आलाय. अभिनेता कैलास वाघमारे, अर्चना महादेव , दिलीप धनावडे, राहुल बेलापुरकर, शिवराज नाळे, देवेंद्र देव, प्रफुल्ल कांबळे, वज्र पवार, यांच्या चित्रपटात प्रमुख भूमिका आहेत.

टी. महेश फिल्म्सच्या टी. महेश आणि अनिल बबनराव वणवे यांनी चित्रपटाची निर्मिती केली आहे. तसंच उमेशचंद्र शिंदे आणि नयन चित्ते सहनिर्माते आहेत. चित्रपटाचं दिग्दर्शन टी. महेश यांनी केलं आहे. जमीर अत्तार यांनी कथा आणि गीतलेखन, महेशकुमार मुंजाळे, जमीर अत्तार आणि निलेश महिगावकर यांनी पटकथा लेखन, संवादलेखन निलेश महिगावकर, योगेश एम. कोळी यांनी छायांकन केलं असून रोहन पाटील यांनी संकलन केले आहे.

बांधकाम मजुराचा मुलगा शेजारी राहणाऱ्या मुलासाठी आणलेला घोडा पाहून तसाच घोडा आणण्याची मागणी करतो. पण आर्थिक परिस्थिती बिकट असलेले त्याचे वडील आपल्या मुलाची इच्छा पूर्ण करू शकतात का ? परिवाराच्या सुखासाठी झटणाऱ्या बापाची अनोखी कहाणी घोडा याचित्रपटातून रुपेरी पडद्यावर झळकणार आहे. मराठी चित्रपटसृष्टीत आतापर्यंत अनेक बाप आणि मुलाच्या नातेसंबंधावर आधारित चित्रपट झाले असले तरी हा चित्रपट नक्कीच वेगळा आहे. कष्टकरी आणि भांडवलदारी वर्ग यांच्या लढ्यात फुलणारं एक गोड स्वप्न म्हणजे हा चित्रपट आहे.

पाहा ट्रेलर:

हृदयस्पर्शी कथानक, कसदार लेखन, उत्तम कलाकार असलेला हा चित्रपट तांत्रिकदृष्ट्याही तितकाच दमदार आहे. ट्रेलर पाहिल्यानंतर प्रेक्षकांमध्ये चित्रपटाबद्दल उत्सुकता वाढली आहे. काही तासांतच ट्रेलरला हजारो लाइक्स मिळाले आहेत.