गंगापूरमधील शेतकऱ्यांचे भाग्य उजळणार; तिन्ही हंगामात शंभर टक्के ड्रीपवर शेती, ही योजना ठरेल वरदान

आमदार प्रशांत बंब यांच्या पुढाकारातून मंजूर झालेल्या या योजनेचा शुभारंभ ११ जानेवारी रोजी लासूर स्टेशन जवळील आरापूर येथे उपमुख्यमंत्री तथा जलसंपदा मंत्री देवेंद्र फडणवीस यांच्या हस्ते होणार आहे.

२४ महिन्यांत काम पूर्ण

आमदार प्रशांत बंब यांनी जलसंपदा विभागाअंतर्गत तत्कालीन मुख्यमंत्री तथा विद्यमान उपमुख्यमंत्री देवेंद्र फडणवीस यांच्याकडे सतत पाठपुरावा करून ३० हजार एकर शेती; तसेच गंगापूर तालुक्यातील चाळीस गावातील लाभधारक शेतकऱ्यांना तिन्ही हंगामात शेती क्षेत्रातून कायमस्वरूपी ड्रीपद्वारे शेतीतून उत्पन्न मिळून शेतकरी सुजलाम सुफलाम होऊन आर्थिकदृष्ट्या सधन होईल, अशी योजना मंजूर करून घेतली. पुढील २४ महिन्यांमध्ये योजनेचे काम पूर्ण होणार असल्याची माहिती आमदार प्रशांत बंब यांनी दिली.

विधिमंडळात प्रश्न

गंगापूर खुलताबाद मतदार संघाचे आमदार बंब यांनी अत्यंत प्रतिकूल परिस्थितीत अभ्यासपूर्ण व बुद्धी कौशल्याने जायकवाडीचे धरणात पाणी आणले. मराठवाडा वॉटर ग्रीड असो, की दुष्काळचा प्रश्न बंब यांनी विधिमंडळात पोटतिडिकीने मांडला. जायकवाडीतून गंगापूर तालुक्याला पाणी नेल्याने दोन-तीन दशकांचा पाण्याचा प्रश्न संपला आहे. आता दररोज हजारो एकर शेती पाण्यामुळे बागायती होण्यास मदत होणार आहे.

वर्षभर सिंचन आवश्यक

गोदातीरी असणाऱ्या गंगापूर तालुक्यातून वाहणाऱ्या नदीवर पैठण येथे जायकवाडी हे मोठे धरण बांधण्यात आले आहे. या धरणाचे बॅकवॉटर गंगापूर तालुक्यातील कायगाव टोकापर्यंत येते. मात्र, ‘धरण उशाला आणि कोरड घशाला,’ अशी स्थिती गंगापूर तालुक्यातील अनेक गावांत पाहायला मिळत होती. येथील ग्रामस्थांना बाराही महिने पुरेल एवढे पाणी उपलब्ध होत नाही. परिणामी, हजारो शेतकऱ्यांना रब्बी अथवा उन्हाळी पिके घेता येत नाहीत. शेतीला बाराही महिने सिंचनाची व्यवस्था असणे गरजेचे आहे.
गळीत हंगामाचा श्रीगणेशा होताच FRPचा वाद, यंदाचे सूत्र काय? सरकार अन् शेतकरी संघटनांचं म्हणणं काय?
पशुपालन व्यवसाय जिकिरीचा

गंगापूर तालुक्यात २०१२ ते २०१४ साली पडलेल्या भीषण दुष्काळात भूजलस्तर खूप खाली गेला. सरकारनेदेखील हा भाग अवर्षण म्हणून घोषित केला आहे. जिथे माणसांना प्यायला पाणी नाही, तिथे पशुपालन व्यवसायदेखील जिकिरीचा झाला आहे. चारा-पाण्याअभावी ग्रामस्थांनी चांगली जनावरे कसायाच्या हवाली केल्याने दुग्धव्यवसाय अडचणीत आला आहे. ५०० फूट खोल खोदूनही पाणी लागत नव्हते. शिवाय अनेक गावांना पिण्याच्या पाण्यासाठी टँकरवर विसंबून राहावे लागते.

पश्चिम महाराष्ट्रात पूर्वीच योजना

पश्चिम महाराष्ट्रामध्ये अशा योजना गेल्या ३० ते ४० वर्षांपूर्वीच झाल्या. त्यामुळे त्या भागातील शेतकरी सधन झाला. शेतकऱ्यांच्या बांधापर्यंत पाणी पोहोचवण्याचे ध्येय घेऊन राजकारणात प्रवेश करणाऱ्या आमदार प्रशांत बंब यांनी न थांबता, न थकता अनेक अडचणींवर मात करीत जायकवाडीचे पाणी शेतकऱ्यांच्या बांधापर्यंत पोहोचवण्यासाठी अथक परिश्रम घेतले. त्यांच्याच परिश्रमाचा परिपाक म्हणजे, ११ जानेवारी २०२४ रोजी उपमुख्यमंत्री तथा जलसंपदा मंत्री देवेंद्र फडणवीस यांच्या हस्ते या योजनेचा शुभारंभ होत आहे.