४० हजार मतदारांना वगळले; पालघर जिल्ह्यातील अंतिम मतदारयादी जाहीर, ९ हजार ८०६ मतदार वाढले

२३ जानेवारी रोजी मुख्य निवडणूक अधिकारी कार्यालयाच्या व जिल्हाधिकारी कार्यालयाच्या वेबसाइटवर आणि मतदार नोंदणी कार्यालयामध्ये अंतिम मतदारयाद्या प्रसिद्ध करण्यात येत आहेत. मतदारांनी मतदाता सेवा पोर्टल https://electoralsearch.eci.gov.in येथे जाऊन यादीत आपले नाव तपासावे आणि सर्व तपशील योग्य आहेत का हे पाहावे, सोबतच मतदान केंद्रसुद्धा तपासून घ्यावे, जेणेकरून मतदानाच्या दिवशी गैरसोय होणार नाही. तसेच, यादीत नाव नसलेल्या नागरिकांनी सहा क्रमांकाचा अर्ज भरून आपला मताधिकार सुनिश्चित करावा, असे आवाहन बोडके यांनी केले.

१८ ते १९ गटात १३ हजार मतदार

या पुनरीक्षण कार्यक्रमानंतर अंतिम मतदारयादीमध्ये १८ ते १९ या वयोगटाचे १३ हजार ९७८ (०.४१ टक्के) मतदार आहेत व २० ते २९ वयोगटातील तीन लाख ८२ हजार ९५३ (११.१३ टक्के) मतदार आहेत. विविध सामाजिक संस्था, महाविद्यालये यांनी राबवलेल्या मतदारनोंदणी शिबिरांमुळे या वयोगटाच्या टक्केवारीत वाढ झाली आहे.

मृत, दुबार मतदार वगळले

येत्या लोकसभा व विधानसभा निवडणुकांच्या पार्श्वभूमीवर मतदारयाद्या अचूक करण्यासाठी जुलै ते ऑगस्ट २०२३ या कालावधीत घरोघरी सर्वेक्षणाची मोहीम राबवण्यात आली होती. या सर्वेक्षणात आढळलेले मृत मतदार, कायमस्वरूपी स्थलांतरित मतदार, तसेच दुबार मतदारांची नावे मतदारयादीतून वगळण्याची कार्यवाही पुनरीक्षणपूर्व कालावधीत तसेच विशेष संक्षिस पुनरीक्षण कालावधीत पूर्ण करण्यात आली. त्यानुसार, १८ हजार २२४ मृत मतदारांची नावे मतदारयादीतून वगळण्यात आली. त्याचप्रमाणे मतदारयाद्यांमध्ये एकसारखी छायाचित्रे असलेले २० हजार ४९ मतदार असल्याचे निदर्शनास आले. त्यांची सखोल तपासणी करून विशेष संक्षिप्त पुनरीक्षण कालावधीत सात हजार ११४ मतदारांची नावे वगळण्यात आली आहेत.

तपशील समान असलेले सात हजार मतदार

मतदारयादीत नाव व इतर काही तपशील समान असलेले सहा हजार ८३९ मतदार आढळून आले. त्यांची सखोल तपासणी करून दोन हजार ५३१ मतदारांची नावे वगळण्यात आली आहेत. ही प्रक्रिया मतदान केंद्रस्तरीय अधिकाऱ्यांमार्फत संबंधित मतदारांच्या गृहभेटी घेऊन, स्पीड पोस्टाने नोटिसा पाठवून, तसेच पूर्ण तपासणी-अंती कायदेशीररीत्या करण्यात आली आहे. या प्रक्रियेमुळे मतदारयादीतील अनावश्यक फुगवटा नाहीसा होऊन आता ती अधिक परिपूर्ण झाल्याचे जिल्हाधिकाऱ्यांनी सांगितले.
कागदपत्रे सादर करा अन्यथा…; मेट्रो रिजनमधील रहिवाशांना ‘एनएमआरडीए’चा इशारा
मतदारनोंदणीची अजूनही संधी

यंदाच्या पुनरीक्षण कार्यक्रमामध्ये मतदारनोंदणीसाठी १ जानेवारी या नेहमीच्या अर्हता दिनांकासह १ एप्रिल, १ जुलै आणि १ ऑक्टोबर या बहु-अर्हता तारखा ठेवण्यात आल्या होत्या. त्यामुळे ऑक्टोबर २०२४ पर्यंत १८ वर्षे पूर्ण करणाऱ्या युवांनाही या मोहिमेत आगाऊ किंवा पूर्वनोंदणी करता आली. त्या-त्या तिमाहीच्या कालावधीत १८ वर्षे पूर्ण होणाऱ्या अर्जदारांच्या अर्जावर प्रक्रिया करण्यात येणार आहे. त्यामुळे पूर्वनोंदणी केलेल्या युवांना पुन्हा अर्ज करण्याची आवश्यकता नाही, मात्र अंतिम यादी प्रसिद्ध झाल्यानंतरही मतदारनोंदणीची निरंतर अद्ययावत प्रक्रिया सुरू असल्यामुळे अद्याप नावनोंदणी न केलेल्या युवांना मतदार नोंदणीची अजूनही संधी असल्याचे जिल्हाधिकारी यांनी सांगितले.

कातकरी मतदारांची नोंदणी

कातकरी जमातीच्या पीव्हीटीजीएस मतदार नोंदणीसाठी विशेष शिबिरे आयोजित करण्यात आली होती. या शिबिरांमध्ये मतदार नोंदणीसह आधारकार्ड, रेशनकार्ड, जातीचा दाखला यांचेही या जमातीतील लोकांना वाटप करण्यात आले. त्यामध्ये कातकरी जमातीच्या एकूण एक हजार ५४६ जणांची मतदारनोंदणी करण्यात आली.