नगरकरांसाठी पाण्याची बोंबाबोंब! महापालिकेने ३ कोटी थकबाकी न भरल्याने शहराचा पाणी पुरवठा खंडित

त्यानंतर महापालिकेने टप्प्या टप्प्याने पैसे देत डिसेंबर २०२३ अखेरपर्यंत सुमारे ३ कोटी महावितरणकडे जमा केले. मात्र, जानेवारी २०२४ ची चालू बिलाची सुमारे २ कोटी ९० लाखाची थकबाकी तातडीने भरावी, असा तगादा महावितरणने लावला होता. मनपाकडे पुरेसे पैसे नसल्याचे प्रशासनाचे म्हणणे होते. पण पैसे आले नसल्याने बुधवारी (३१ जानेवारी) सायंकाळी ७ वाजता मुळा धरण येथील मुख्य वीज कनेक्शनची वीज महावितरणने तोडली.

बुधवारी सायंकाळी वीज तोडल्यानंतर धरणातून पाणी उपसा बंद झाला आहे. मात्र, बुधवारी सायंकाळी सावेडीच्या व नगर शहरातील काही भागात पाणीपुरवठा झाला. पण, सायंकाळी ७ नंतर पाणी पुरवठा सुरू असलेल्या सर्व उपनगरांचा पाणी पुरवठा बंद झाला आहे. गुरुवारी मात्र कोठेच पाणीपुरवठा होऊ शकला नाही. सावेडीची उंच टाकी असलेल्या भागातील गुलमोहोर रोड, प्रोफेसर कॉलनी परिसर, सिव्हील हडको, प्रेमदान हडको, टी.व्ही. सेंटर परिसर, म्युनिसीपल हडको व तारकपूर परिसर तसेच पाईपलाईन रोड परिसरातील काही भागात पाणी आले नाही. तसेच मध्य नगर शहरातील कोठी, झेंडीगेट, रामचंद्रखुंट, मंगलगेट, जिल्हाधिकारी कार्यालय परिसर, दाळमंडई, काळू बागवान गल्ली, धरती चौक, बंगाल चौकी, माळीवाडा स्टेशन रोड, आगरकर मळा, विनायक नगर सह सर्व उपनगरांच्या भागात पाणी आले नाही.

मनपाने पैसे भरल्यावर महावितरणकडून मुळानगर येथील मुख्य कनेक्शनची वीज पुन्हा जोडली जाईल, पण यासाठी कधी मुहूर्त लाभेल, हे गुलदस्त्यात आहे. मात्र, पाणी येणार नसल्याने शहरात पाण्याची बोंबाबोंब होणार आहे. वीज पुरवठा पुन्हा सुरू झाला तरी पाण्याच्या अवाढव्य पाईपलाईनमधील पाणी व हवेचा दाब नियंत्रित करीत हळूहळू उपसा क्षमता वाढवावी लागणार असल्याने पुढचे किमान तीन दिवस तरी शहराचा पाणीपुरवठा विस्कळित राहणार आहे.