पार्किंगमधून गाडी काढायला होते अडचण; काळजी नको, आता Google करेल मदत

आपल्या प्रवासादरम्यान गाडी कुठल्या मार्गाने पुढे न्यायची यासाठी तर आपल्याला ‘Google maps’ नेहमीच मदत करत असते. परंतु आता हेच ‘Google map’ आपल्या गाडीला केवळ रस्ताच दाखविणार नाही तर पार्किंगमधून गाडी सहीसलामत बाहेर काढायलाही मदत करणार आहे.

सांगणार एन्ट्री आणि एक्झिट

गुगल मॅप्समध्ये लवकरच नवीन फीचर्स येणार आहेत, त्यापैकी एक म्हणजे आता गुगल मॅप्स तुम्हाला कोणत्याही इमारतीचे गेट शोधण्यात किंवा पार्किंगमधून बाहेर पडण्यासाठी मदत करेल. हे फीचर तुम्हाला बिल्डिंगमधून कुठून एन्ट्री आणि कुठून एक्झिट हे सांगून गाईड करेल, जेणेकरून तुम्ही Google मॅप्सच्या मदतीने कोणत्याही अडचणीशिवाय तुमच्या डेस्टिनेशन पर्यंत पोहोचू शकता.

गुगल मॅपवरून रस्ता चुकणे

अनेकवेळा असे घडले असेल की, तुम्ही गुगल मॅप वापरून एखाद्या ठिकाणी पोहोचलात, पण ते गेट चुकीच्या बाजूने किंवा वेगळ्या रस्त्याने निघाले. अशा समस्यांवर मात करण्यासाठी गुगल एक नवीन फीचर आणण्याचा प्रयत्न करत आहे. हे फीचर आपल्याला कोणत्याही इमारतीचे योग्य गेट शोधण्यात मदत करेल.

चाचणी सुरू आहे

अँड्रॉइड पोलिसांच्या बातमीनुसार, गुगल सध्या या फीचरची चाचणी करत आहे. चाचणी दरम्यान, हे फीचर Google Pixel 7a फोनवर Google Maps आवृत्ती 11.17.0101 मध्ये फक्त काही लोकांनाच दिसते. या फीचरमध्ये, जेव्हा तुम्ही एखादे ठिकाण निवडता तेव्हा त्या ठिकाणचे अचूक प्रवेशद्वार आणि एक्झिट गेटचे चिन्ह नकाशावर दिसेल.अहवालानुसार, जेव्हा तुम्ही एखादे ठिकाण निवडता आणि नकाशावर झूम इन कराल, तेव्हा योग्य गेट पांढरे वर्तुळ आणि त्यात प्रवेश चिन्हासह दर्शविले जाईल. याद्वारे तुम्हाला इमारतीत कुठून प्रवेश करायचा आणि कुठून बाहेर पडायचे हे कळेल. या फीचरची चांगली गोष्ट म्हणजे, सध्या हॉटेल्स, सुपरमार्केट आणि रेस्टॉरंट्ससारख्या अनेक प्रकारच्या इमारतींवर याची चाचणी केली जात आहे. तथापि, हे फीचर सध्या सर्वत्र काम करत नाही कारण Google अजूनही आवश्यक माहिती गोळा करत आहे.

Google ने Maps वर जोडली अनेक नवी फीचर्स

हे फीचर लहान इमारतींसाठी उपयुक्त नसले तरी, तुम्ही जर मॉल किंवा हॉस्पिटलसारख्या मोठ्या ठिकाणी जात असाल तर ते सुलभ आहे. तथापि, हे फीचर सध्या डेव्हलपमेंटच्या सुरुवातीच्या टप्प्यात असल्याचे दिसते आणि ते प्रत्येकासाठी उपलब्ध होण्यासाठी काही वेळ लागू शकतो.

गेल्या काही आठवड्यांमध्ये, Google ने अनेक नवीन फीचर्स Maps वर जोडली आहेत जसे की, ‘Glanceable Directions’, हे एक नवीन फीचर आहे जे फोन लॉक असतानाही दिशा दाखवते आणि याबरोबरच नवीन ठिकाणे शोधण्यासाठी ‘जनरेटिव्ह AI पॉवर्ड सर्च’ हे फीचरही आणले आहे.