Tej Police Times
Paris Olympics: ऑलिम्पिकआधीच भारताला मोठा धक्का, बॉक्सर मेरी कोमचा पथकप्रमुखपदाचा राजीनामा
वृत्तसंस्था, नवी दिल्ली : पॅरिस ऑलिम्पिक स्पर्धा काही महिन्यांवर येऊन ठेपली असताना भारतासमोरील आव्हानांच्या यादीत नवी भर पडली आहे. भारतीय ऑलिम्पिक संघटनेत (आयओए) सुरू असलेला संघर्ष, उत्तेजकांत दोषी ठरलेले सर्वाधिक खेळाडू, या पार्श्वभूमीवर जगज्जेती बॉक्सर मेरी कोमने पॅरिसमधील या स्पर्धेसाठी भारताचे पथकप्रमुखपद सोडण्याचा निर्णय शुक्रवारी घेतला.
मेरी कोमची पॅरिसमधील ऑलिम्पिक स्पर्धा खेळून निवृत्त होण्याची इच्छा होती. मात्र, ती ४१ वर्षांची असल्यामुळे तिला बॉक्सिंगच्या स्पर्धेत प्रवेश मिळणार नाही, हे स्पष्ट होते. मेरी कोम पथकप्रमुख होण्यासही तयार नव्हती. मात्र, भारतीय ऑलिम्पिक संघटनेच्या अध्यक्ष पी. टी. उषा आणि क्रीडा मंत्रालयातील अधिकाऱ्यांनी तिचे मन वळवले. मात्र, मेरी कोमने नियुक्तीनंतर सुमारे एका महिन्याने पथकप्रमुखपद सोडण्याचा निर्णय घेतला. ‘शक्य त्या सर्व मार्गाने देशाची सेवा करायला मिळणे, हा मी माझा सन्मान समजते. यासाठी मी नेहमीच मानसिकदृष्ट्या सज्ज असते. मात्र, काही वैयक्तिक कारणास्तव मला पथकप्रमुखपद सांभाळता येत नसल्याची खंत वाटत आहे,’ असे मेरी कोमने उषा यांना लिहिलेल्या पत्रात म्हटले आहे. भारतीय ऑलिम्पिक संघटनेने २१ मार्च रोजी मेरी कोमची या पदासाठी निवड केली होती. मेरी कोमने २०१२च्या लंडन ऑलिम्पिकमध्ये ब्राँझपदक मिळवले होते.
मेरी कोमच्या निर्णयाचा आम्ही आदर करतो, असे उषा यांनी म्हटले आहे. मेरी कोमच्या जागी नवीन पथकप्रमुखाची लवकरच निवड करण्यात येणार असल्याचेही उषा यांनी सांगितले. ‘मी तिची विनंती समजू शकते. तिच्या निर्णयाचा मला आदर आहे. पत्र मिळाल्यावर मी तिच्याशी संवादही साधला. तिला समजून सांगण्याचा प्रयत्न केला. माझी सर्वांना विनंती आहे की आपण मेरी कोमच्या निर्णयाचा आदर करावा,’ असे उषा यांनी सांगितले.
भारतीय ऑलिम्पिक संघटनेने सहा वेळा विंटर ऑलिम्पिकमध्ये सहभागी झालेल्या ल्युगरपटू शिवा केशवनची उप-पथक प्रमुख निवड केली आहे. अनुभवी टेबल टेनिसपटू शरथ कमल हा भारतीय पथकाचा ध्वजधारक असणार आहे.
आधीच उशीर, त्यात…
मेरी कोमच्या राजीनाम्यामुळे नव्या पथकप्रमुखांच्या नियुक्तींचे आव्हान असेल. भारतीय ऑलिम्पिक संघटनेतील संघर्ष पाहता हे सोपे नसेल. पथकप्रमुखांची निवड त्यामुळे उशिरा झाली होती. त्यामुळे ऑलिम्पिक पथकप्रमुखांच्या पहिल्या बैठकीस भारताकडून कोणीही उपस्थित नव्हते. आता ऑलिम्पिकला जेमतेम शंभर दिवस असताना पुन्हा पथकप्रमुख नियुक्तीची प्रक्रिया करावी लागणार आहे.