या चुकांमुळे होऊ शकतो फोनचा स्फोट, उन्हाळ्यात असतो सर्वाधिक धोका

उन्हाळ्यात स्मार्टफोनची नीट काळजी न घेतल्यास तुमच्या अडचणीत वाढ होऊ शकते. यामुळे स्मार्टफोनचा स्फोट होण्याच्या शक्यता वाढते. जर तुम्हाला देखील स्मार्टफोनला आग लागण्याची भीती असेल आणि याबाबत काळजी घ्यायची असेल तर तुम्हाला काही चुका टाळायला हव्यात. या चुकांमुळे तुमच्या अडचणी सहज वाढू शकतात. आज आम्ही तुम्हाला अश्याच चुकांची माहिती देणार आहोत ज्यांच्यामुळे स्मार्टफोनला आग लागू शकते किंवा स्फोट देखील होऊ शकतो.

ओरिजनल चार्जर न वापरणे

स्मार्टफोन चार्ज करताना तुम्हाला विशेष काळजी घेतली पाहिजे कारण तुम्ही जर डुप्लीकेट चार्जरनं तुमचा फोन चार्ज करत असाल तर असं केल्यामुळे बॅटरीचा स्फोट होण्याची शक्यता असते. कारण बनावट चार्जरमुळे बॅटरी अनेकदा गरजेपेक्षा जास्त गरम होते आणि यात स्फोट होतो. म्हणून नेहमी फक्त ओरिजिनल चार्जरचा वापर करा जो मोबाइलच्या बॉक्समध्ये येतो. तो नसल्यास तुम्ही सर्व्हिस सेंटरवर अधिकृत चार्जर खरेदी करू शकता.

हेव्ही गेम्सचा वापर

जर तुम्ही गरजेपेक्षा जास्त हेव्ही गेम्स तुमच्या मोबाइलमध्ये खेळत असा तर ते करणे टाळा. हेव्ही गेम्स आणि अ‍ॅप्स बॅटरीवर खूप दबाव टाकतात आणि स्मार्टफोन जबरदस्त गरम होतो आहे आणि जर असं सतत सुरु राहील तर बॅटरी फुटू देखील शकते, ज्याचे परिणाम वाईट ठरू शकतात.

अयोग्य स्मार्टफोन कव्हर

स्मार्टफोनचा कव्हर निवडताना तुम्हाला विशेष काळजी घेतली पाहिजे. महत्वाची म्हणजे कव्हरची जाडी खूप महत्वाची असते. तुमच्या मोबाइलसाठी जो कव्हर तुम्ही खरेदी कराल तो जास्त जाड नसावा, त्यामुळे स्मार्टफोनची हीट बाहेर निघेल. जर तुम्ही गरजेपेक्षा जास्त जाड आणि हार्ड कव्हर खरेदी केला तर त्यामुळे उष्णता फोनमध्ये अटकून राहील आणि बॅटरीमध्ये स्फोट होऊ शकतो.

स्टोरेज फुल

कधीही तुमच्या स्मार्टफोन मधील स्टोरेज फुल होऊ देऊ नका कारण त्यामुळे प्रोसेसिंग नीट होत नाही त्याचा परिणाम चिपसेटवर होतो आणि शेवटी बॅटरी देखील गरम होते कारण स्मार्टफोनमधील हिट जास्त बॅटरीवरच परिणाम करते. स्टोरेज फुल असल्यावर प्रोसेसर स्लो होतो आणि हीट जनरेट करतो आणि बॅटरीचा स्फोट होऊ शकतो.

फोन थेट उन्हात ठेवणे

तुमचा स्मार्टफोन कधीही अश्या ठिकणी ठेवू नका जिथे खूप जास्त उष्णता असेल. फोन थेट उन्हात ठेऊ नका त्यामुळे फोन गरम होऊन ब्लास्ट होण्याची शक्यता वाढते. कारच्या डॅशबोर्डवर किंवा बाइकवर नेव्हिगेशनसाठी फोन ठेवल्यामुळे ब्लास्टची शक्यता वाढते.