अमेरिकेतील तमाम विद्यापीठांमध्ये विद्यार्थ्यांनी पुकारले आंदोलन; कॉलेजांमध्ये हकालपट्टी आणि अटकसत्र

लॉस एंजेल्स: इस्रायल आणि हमासदरम्यान सुरू असलेल्या संघर्षात होरपळणाऱ्या गाझामधील नागरिकांच्या समर्थनार्थ अमेरिकेतील तमाम विद्यापीठांमध्ये विद्यार्थ्यांनी आंदोलन पुकारले आहे. या आंदोलनाचे सावट आता विद्यापीठांमधील आगामी पदवीप्रदान कार्यक्रमांवरही आहे.

शनिवार-रविवार असल्याने आंदोलक विद्यार्थ्यांनी विद्यापीठांमधील तंबूमध्येच मुक्काम ठोकून निषेध केला. त्यामुळे येथे काहीशी शांतता होती. मात्र काही कॉलेजांमध्ये हकालपट्टी आणि अटकसत्र सुरू होते. विद्यापीठांनी युद्धखोर इस्रायलशी आर्थिक संबंध तोडावे, अशी या विद्यार्थ्यांची मागणी आहे.

रविवारी लॉस एंजेल्समधील कॅलिफोर्निया विद्यापीठात दोन्ही गटांतील विद्यार्थ्यांनी निदर्शने केली. यावेळी धक्काबुक्कीच्या घटनाही घडल्या. मात्र यात कोणीही जखमी झाले नाही. तर, ब्लूमिंग्टनमधील इंडियाना विद्यापीठ, अॅरिझोना स्टेट विद्यापीठ आणि सेंट ल्युइसमधील वॉशिंग्टन विद्यापीठांसह विविध विद्यापीठांच्या कॅम्पसमधून शनिवारी २७५ जणांना अटक करण्यात आली. आतापर्यंत देशभरातून ९०० आंदोलकांना अटक करण्यात आली आहे.

न्यूयॉर्क
पॅलेस्टिनींच्या समर्थनार्थ सुरुवातीपासूनच आंदोलन पुकारणाऱ्या कोलंबिया विद्यापीठात आंदोलक विद्यार्थ्यांनी संकुलाच्या आवारातच तंबू उभारले आहेत. विद्यापीठ प्रशासनाने विद्यार्थ्यांना ही जागा सोडण्यासाठी अखेरची मुदत केव्हाच टळून गेली आहे. मात्र आंदोलकांनी आपला मुक्काम हलवलेला नाही. तरीही कॉलेज प्रशासन पोलिसांना पाचारण करणार नसल्याचे प्रशासनाने विद्यार्थ्यांना लिहिलेल्या पत्रात नमूद केले आहे. विद्यापीठाचे प्रशासन आणि विद्यार्थ्यांमध्ये वाटाघाटी सुरू आहेत. तर, विद्यापीठात मेमध्ये होणाऱ्या पदवीदान कार्यक्रमाच्या तयारीलाही सुरुवात झाली आहे.

कॅलिफोर्निया
कॅलिफोर्निया विद्यापीठात रविवारी इस्रायल समर्थक आणि पॅलिस्टिनी समर्थक आंदोलक एकमेकांसमोर उभे ठाकले होते. कोणताही अनर्थ घडू नये, यासाठी पोलिसांनी येथे बॅरिकेड उभारले होते. आदल्या दिवशी आंदोलन चिघळल्यामुळे बंद असलेले सदर्न कॅलिफोर्निया विद्यापीठाचे दार रविवारी खुले करण्यात आले. गेल्या आठवड्यात आंदोलन उग्र झाल्याने पोलिसांनी ९० हून अधिक आंदोलकांना अटक केली होती. त्यामुळे विद्यापीठाला त्यांचा मुख्य पदवीदानाचा कार्यक्रम रद्द करावा लागला होता.

मिसौरी
सेंट लुइस येथील वॉशिंग्टन विद्यापीठाने आवारातील काही इमारतींना टाळे ठोकून शनिवारी आंदोलकांना अटक केली होती. अतिक्रमणाचा प्रयत्न केल्याच्या संशयावरून २३ विद्यार्थ्यांसह १००हून अधिक जणांना अटक करण्यात आल्याचे विद्यापीठातर्फे सांगण्यात आले.

मॅसॅच्युसेट्स
बोस्टनमधील नॉर्थईस्टर्न विद्यापीठाच्या आवारातील दंगल थोपवण्यासाठी येथे विद्यार्थ्यांनी उभारलेल्या छावण्या पोलिसांनी शनिवारी काढून टाकल्या आणि १०२ निदर्शकांना अटक केली. त्यांच्यावर अतिक्रमण आणि बेशिस्त वर्तनाचा ठपका ठेवण्यात आला आहे. दोन दिवसांपूर्वी सुरू झालेल्या निदर्शनात विद्यापीठाशी संबंधित नसलेल्या व्यावसायिक आयोजकांकडून घुसखोरी करण्यात आल्याचा दावा विद्यापीठ प्रशासनाने निवेदनाच्या माध्यमातून केला आहे. त्यात ज्यूंविरोधात अपशब्दही उच्चारण्यात आले होते. मात्र पॅलेस्टाइन समर्थक संघटनेने विरोधी गटच या अपशब्दांसाठी जबाबदार असल्याचा दावा करून कोणत्याही विद्यार्थी आंदोलकांनी घृणास्पद द्वेषयुक्त विधानाचा पुनरुच्चार न केल्याचे स्पष्ट केले.