गाझाच्या मदतीचे दरवाजे इस्रायलकडून खुले; कोणतीही मदत सीमापार पोहोचली नसल्याचा संयुक्त राष्ट्रांचा दावा

जेरूसलेम: गाझा पट्टीमध्ये मानवतावादी मदतीचा पुरवठा करण्यासाठी महत्त्वाचा असलेला किरीम शालोम हा सीमामार्ग अखेर दोन दिवसांनंतर इस्रायलने पुन्हा खुला केला आहे. या सीमेच्या परिसरात झालेल्या हमासच्या रॉकेट हल्ल्यात चार इस्रायली सैनिकांचा मृत्यू झाल्यानंतर इस्रायल लष्कराने हा सीमामार्ग बंद केला होता. पॅलेस्टाइनच्या निर्वासितांसाठी काम करणाऱ्या संयुक्त राष्ट्रांच्या संस्थेने मात्र कोणतीही मदत अद्याप सीमापार पोहोचू शकलेली नाही आणि पॅलेस्टाइनच्या बाजूला ही मदत घेण्यासाठी कोणीही नाही, असे स्पष्ट केले आहे.

इस्रायलच्या लष्कराने मंगळवारी गाझा आणि इजिप्तमधील राफा सीमावर्ती भागावर ताबा मिळवल्यानंतर मदतकार्य करणाऱ्या संस्थांच्या कार्यकर्त्यांनी येथून पलायन केले आहे. त्यामुळे ही परिस्थिती ओढवल्याचे समजते. राफा सीमा अद्याप इस्रायलने खुली केलेली नाही. इस्रायलने राफा शहरावर अंशतः ताबा मिळवल्याचे वारंवार इस्रायलतर्फे सांगितले जात आहे. मात्र दोन मुख्य सीमामार्ग बंद केल्यामुळे पॅलिस्टिनींना मानवतावादी मदत पोहोचवण्यात अडथळा येऊ शकतो, अशी भीती संयुक्त राष्ट्रांनी व्यक्त केली आहे.
इस्रायली फौजा राफाच्या वेशीवर; गाझा पट्टीतील पॅलिस्टिनींच्या मदतीला फटका बसण्याची भीती

इस्रायल राफावर पूर्णपणे ताबा मिळवेल, या चिंतेमुळे अमेरिकेने इस्रायलला गेल्या आठवड्यात होणारा बॉम्बचा पुरवठा थांबवला आहे. इस्रायल-हमास दरम्यानच्या युद्धामुळे होरपळलेल्या १३ लाख पॅलिस्टिनींच्या भवितव्याबाबत अमेरिकेने चिंता व्यक्त केली आहे. त्यामुळे अमेरिका आणि इस्रायलमध्ये दुरावा निर्माण झाला आहे. तर, इस्रायलने राफावर मिळवलेल्या ताब्याचे समर्थन केले आहे. राफा हा हमासचा शेवटचा गड आहे आणि त्याची लष्करी आणि प्रशासकीय क्षमता नष्ट करण्यासाठी तेथे व्यापक आक्रमण आवश्यक असल्याचे स्पष्टीकरण इस्रायलच्या लष्कराकडून दिले जात आहे.या कारवाईमुळे गाझाच्या सर्व सीमांवर आता इस्रायलचे नियंत्रण आहे.

इस्रायल-हमास दरम्यान युद्ध सुरू झाल्यापासून राफा सीमामार्ग हा पॅलिस्टिनींना मदत पोहोचण्यासाठी महत्त्वाचा मार्ग मानला जातो. येथूनच नागरिक ये-जा करू शकतात. तर, कीरीम शालोम हा भाग गाझाचे मुख्य कार्गो टर्मिनल आहे.

राफा सीमावर्ती भागावर रात्रभर बॉम्बस्फोट आणि बंदुकीच्या फैऱ्यांचे आवाज ऐकू येत होते. बुधवारी पहाटे दोन मोठे स्फोटही झाले. तर, राफाकडून कीरीम शालोम सीमेच्या दिशेने मंगळवारी सहा क्षेपणास्त्र डागण्यात आल्याचे इस्रायलच्या लष्करातर्फे सांगण्यात आले. पॅलिस्टाइनमधील लष्करी मोहिमेची सूत्रे चालवणाऱ्या सीओजीएटी या इस्रायलच्या लष्कराने सांगितल्याप्रमाणे, बुधवारी पहाटे कीरीम शालोम सीमावर्ती भाग बुधवारी पहाटे खुला करण्यात आला. मात्र संयुक्त राष्ट्रांच्या स्वयंसेवी संस्थेच्या मते, बुधवार दुपारपर्यंत एकही मदतीचा ट्रक येथे पोहोचू शकला नव्हता.

रुग्ण ताटकळले

स्वयंसेवी संस्थेला राफामधून आयात होणाऱ्या इंधनावरच अवलंबून राहावे लागत आहे. गाझाच्या आरोग्य मंत्रालयाने सांगितल्यानुसार, किमान ४६ रुग्ण आणि जखमींना मंगळवारी वैद्यकीय उपचारासाठी तेथून बाहेर काढले जाणार होते. मात्र ते ताटकळले आहेत. तर, इस्रायलने मंगळवारी सुमारे ६० मदतीचे ट्रक सीमेकडून आल्याचा दावा केला आहे.