माझी जीभ घसरली, कृपया ‘त्याला’ मुद्दा बनवू नका, पात्रांची माफी पण भाजप अडचणीत!

मंगेश वैशंपायन, ओडिशा : ओडिशासह देशाचे श्रद्धास्थान असलेल्या महाप्रभू जगन्नाथ यांच्याबद्दल पुरी लोकसभा मतदारसंघातील भाजपचे उमेदवार संबित पात्रा यांनी केलेल्या वादग्रस्त वक्तव्याचे संपूर्ण राज्यात तीव्र पडसाद उमटले आहेत. केवळ पुरीच नव्हे, तर लोकसभेच्या उर्वरित बाराही जागांवर भाजपला याचा थेट फटका बसण्याची भीती पक्षात व्यक्त केली जाते. ‘भाजपच्या मूठभर लोकांना कोट्यवधी लोकांच्या श्रद्धेला धक्का लावण्याचा अधिकार कोणी दिला?’ असा प्रश्न विचारला जात आहे.

‘भगवान जगन्नाथ हे पंतप्रधान नरेंद्र मोदी यांचे भक्त आहेत,’ अशी मुक्ताफळे पात्रा यांनी उधळली होती. ओडिशाचे मुख्यमंत्री नवीन पटनायक, काँग्रेस अध्यक्ष मल्लिकार्जुन खर्गे, राहुल गांधी यांच्यासह अनेक बड्या नेत्यांनी पात्रा यांच्या वक्तव्यावर टीकास्त्र सोडले. सोमवारी दुपारी केलेल्या वक्तव्याबद्दल माफी मागण्यास पात्रा यांना मध्यरात्रीचा एक का वाजला, असा प्रश्नही केला जात आहे. ‘आपली जीभ घसरल्या’चे मान्य करताना, त्याला मुद्दा बनवू नका, असे पात्रा म्हणाले.
अमित शहांनी केलेल्या दाव्याने विरोधकांच्या पोटात गोळा आला; म्हणाले, पाच टप्प्यांनंतर इतक्या जागांवर विजय निश्चित

ओडिशात लोकसभेच्या सहा जागांवर शनिवार, २५ मे रोजी मतदान होणार आहे. यात पुरी व राजधानी भुवनेश्वरसह केओंझार, ढेंकनाल, कटक या जागांचाही समावेश आहे. केंद्रीय मंत्री धर्मेंद्र प्रधान हे संबलपूरमधून, तर स्वतः पात्रा पुरीमधून निवडणूक लढवत आहेत. तर अंतिम सहा जागांसाठी १ जून रोजी, सातव्या टप्प्यात मतदान होईल. यात मयूरभंज, बालासोर, भद्रक, जाजपूर, केंद्रापाडा व जगतसिंगपूर यांचा समावेश आहे. भाजपचे उपाध्यक्ष जय पांडा केंद्रापाडा येथून निवडणूक लढवत आहेत.
इंडिया आघाडीची कामगिरी चांगली, देशात सरकार आम्हीच स्थापन करणार, मल्लिकार्जुन खर्गेंचा आत्मविश्वास दुणावला

हे पाप ओडिशाची जनता विसरणार नाही, नवीन पटनायक यांचा इशारा

संबित पात्रा यांच्या विधानावर, ‘महाप्रभूंना कोणत्याही मानवाचा भक्त म्हणणे हा ईश्वराचा अपमान आहे. हे पाप ओडिशाची जनता विसरणार नाही,’ असा इशारा मुख्यमंत्री नवीन पटनायक यांनी दिला. तर ‘सत्तेच्या नशेतील भाजप आमच्या देवांनाही सोडत नाही. पण ४ जून रोजी जनता यांचा अहंकार संपवेल. पात्रा यांच्या विधानामुळे जगभरातील कोट्यवधी जगन्नाथभक्त आणि ओडियांच्या श्रद्धेला धक्का बसला आहे,’ असा हल्लाबोल काँग्रेस अध्यक्ष मल्लिकार्जुन खर्गे यांनी केला.

२०१९मध्येही अशीच चूक

भगवान जगन्नाथाबाबत केलेली चूक पात्रा यांना याच पुरी मतदारसंघात २०१९मध्येही भोवली होती. लोकसभा निवडणुकीच्या प्रचारादरम्यान पात्रा यांनी जगन्नाथाच्या मूर्तीसोबत रोड शो केला होता. पात्रा यांनी राजकीय फायद्यासाठी भगवान जगन्नाथाचा वापर केला, हे ओडिशाच्या संस्कृतीच्या विरोधात आहे, अशी तक्रार त्यांच्याविरोधात दाखल झाली होती.

राहुल गांधी यांची सडकून टीका

जेव्हा पंतप्रधान स्वतःला सम्राट मानू लागतात आणि दरबारी त्यांना देव मानू लागतात, तेव्हा पापाच्या लंकेचे पतन जवळ आले आहे, असा त्याचा अर्थ स्पष्ट होतो. हा अहंकारच त्यांच्या विनाशाला कारणीभूत ठरेल- राहुल गांधी, काँग्रेस नेते