Narendra Modi Attack Congress: ‘काँग्रेस जिंकल्यास दहशतवाद्यांना बिर्याणी खाऊ घालेल’; नरेंद्र मोदींचा घणाघात

श्रवस्ती: ‘काँग्रेस सत्तेवर आल्यास सीएए रद्द करेल आणि काश्मीरमध्ये पुन्हा कलम ३७० प्रस्थापित करेल. जे दहशतवादी आज तुरुंगात आहेत, त्यांना काँग्रेस पंतप्रधानांच्या घरी आमंत्रण देऊन बिर्याणी खाऊ घालेल,’ असा घणाघात पंतप्रधान नरेंद्र मोदी यांनी बुधवारी उत्तर प्रदेशातील श्रवस्ती येथे केला.भाजपचे उमेदवार साकेत मिश्रा यांच्या प्रचारासाठी पंतप्रधान मोदी यांनी येथे प्रचारसभा घेतली. त्यावेळी त्यांनी काँग्रेस आणि समाजवादी पक्षांचा समाचार घेतला. सन २०१७च्या उत्तर प्रदेश विधानसभा निवडणुकीत या दोन्ही पक्षांची आघाडी अपयशी ठरली होती. त्याची आठवण मोदींनी करून दिली. ‘त्यांनी ६० वर्षांत काहीही केलेले नाही आणि आता ते मोदी व त्यांचे काम थांबवण्यासाठी एकत्र आले आहेत. उत्तर प्रदेशात दोन मुलांचा फ्लॉप चित्रपट पुन्हा प्रसिद्ध होत आहे,’ अशी टीका करत मोदी यांनी ‘दोन शहजादे मोदींनी केलेले काम थांबवतील,’ असा इशारा देऊन काँग्रेस नेते राहुल गांधी आणि समाजवादी पक्षाचे अखिलेश यादव यांना लक्ष्य केले. तसेच, ‘दोन्ही पक्ष जनधन खाती बंद करतील, त्यातील पैसै काढून घेतील. वीजजोडणी तोडतील आणि नळही पळवून देतील,’ असा आरोपही मोदी यांनी केला.

बस्ती येथील प्रचारसभेत मोदी यांनी काँग्रेस व समाजवादी पक्ष ‘पाकिस्तानचे सहानुभूतीदार’ आहेत, असा आरोप करून हे पक्ष पाकिस्तानच्या अणुऊर्जेची भीती दाखवून देशाला घाबरवत असल्याचा दावा केला.

‘दहशतवादाचा हा आश्रयदाता एकेकाळी आपल्याला घाबरवत होता, आता तिथल्या लोकांना साधे अन्नधान्य मिळवणेही कठीण झाले आहे. पाकिस्तान संपला आहे, मात्र त्यांचे सहानुभूतीदार असलेले सपा आणि काँग्रेस देशाला घाबरवण्यात व्यग्र आहेत,’ अशी टीका त्यांनी केली. ‘ते म्हणतात, आपण पाकिस्तानला घाबरले पाहिजे कारण त्यांच्याकडे अणुबॉम्ब आहेत. त्यांना माहीत नाही का, की ५६ इंची छाती काय असते. हे कमजोर काँग्रेस सरकार नाही, परंतु सशक्त मोदी सरकार आहे,’ असे त्यांनी बजावले. बस्ती येथे हरिश द्विवेदी भाजपचे उमेदवार आहेत.
आणीबाणी घोषित झाली, त्या धक्क्याने माझी आई गेली, लोकशाहीचा गळा घोटला तो…. राजनाथ सिंहांचा काँग्रेसवर घणाघात

‘हे लोक सनातन धर्म नष्ट करण्याची भाषा करतात. काँग्रेसच्या शहजाद्याला सर्वोच्च न्यायालयाचा राम मंदिराचा निर्णय बदलायचा आहे. त्यांना पुन्हा बाबरीचे कुलूप राम मंदिराला लावायचे आहे आणि रामलल्लाला पुन्हा तंबूत पाठवायचे आहे,’ असा आरोपही मोदी यांनी केला. तर, दलित आणि मागासवर्गीयांचे आरक्षण हिरावून घेऊन जे व्होट जिहाद करतात, त्यांना ते द्यायचे आहे,’ असेही मोदी म्हणाले.

‘मतपेढीसाठी ममतांकडून देशाची सुरक्षिततेशी तडजोड’

कांथी (प. बंगाल) : केंद्रीय गृहमंत्री अमित शहा यांनी बुधवारी पश्चिम बंगालच्या मुख्यमंत्री ममता बॅनर्जी यांच्यावर मतपेढीच्या राजकारणासाठी राष्ट्रीय सुरक्षेशी तडजोड करण्याचा व घुसखोरांना राज्याचे लोकसंख्याशास्त्र बदलण्याची परवानगी देण्याचे पाप केल्याचा आरोप केला. राज्यात भाजपने ३० लोकसभा जागा जिंकल्यावर तृणमूल काँग्रेसमध्ये फूट पडून बॅनर्जी सरकारला निरोप दिला जाईल, असा दावाही शहा यांनी प्रचारसभेदरम्यान केला. ‘घुसखोरांमुळे राज्याचे लोकसंख्याशास्त्र बदलू लागले असून त्याचा परिणाम केवळ बंगालवरच नव्हे तर संपूर्ण देशावर होत आहे. हे घुसखोर ममतांची मतपेढी आहेत आणि त्यांनाच खूष करण्यासाठी त्या सीएएला विरोध करत आहेत,’ असा आरोपही शहा यांनी केला.