‘माँ गंगा ने मुझे गोद लिया’है, मैं यहीं का हो गया हूं’ PM मोदींची वाराणसीत मतदारांना भावनिक साद

PM Modi : तिसऱ्यांदा पुन्हा निवडून आल्यानंतर पंतप्रधान नरेंद्र मोदी यांनी पहिल्यांदाच त्यांचा लोकसभा मतदारसंघ वाराणसीला भेट दिली. त्यांच्या भेटीदरम्यान, त्यांनी पीएम किसान सन्मान निधी योजनेच्या १७ व्या हप्त्याचे वितरण शेतकऱ्यांच्या खात्यात केले आणि नुकत्याच झालेल्या लोकसभा निवडणुकीत वाराणसीच्या लोकांच्या पाठिंब्याबद्दल कृतज्ञता व्यक्त केली.

निवडणुकीत, पंतप्रधान मोदींनी काँग्रेस उमेदवार अजय राय यांचा १,५२,५२३ मतांच्या फरकाने पराभव करत महत्त्वपूर्ण विजय मिळवला. पीएम मोदींना ६,१२,९७० मते मिळाली, तर राय यांना ४,६०,४५७ मते मिळाली. बहुजन समाज पक्षाचे उमेदवार अथर जमाल लारी ३३,७६६ मतांसह तिसऱ्या स्थानावर आहेत.

“काशीच्या जनतेच्या प्रेमामुळे आणि आशीर्वादामुळे मला देशाचा पंतप्रधान होण्याची संधी मिळाली आहे. काशीच्या जनतेने मला तिसऱ्यांदा त्यांचा प्रतिनिधी म्हणून निवडले आहे. ‘माँ गंगा ने मुझे गोद ले लिया’ है, मैं यहीं का हो गया हूं’ (माता गंगा ने मला दत्तक घेतले आहे, मी आता वाराणसीचा भाग आहे) असे मोदी म्हणाले.
भव्य रोड शो, गंगा घाटावर आरती, लोकसभा निकालानंतर पीएम मोदींचे वाराणसीत शक्तीप्रदर्शन

१८ व्या लोकसभा निवडणुकीत देशातील ६४ कोटींहून अधिक लोकांनी मतदान केले आहे , मी अलीकडेच G7 शिखर परिषदेत सहभागी होण्यासाठी इटलीला गेलो होतो. जर आपण G7 देशांचे सर्व मतदार जोडले तरीही भारतातील मतदारांची संख्या 1.5 पट जास्त असेल,” असे मोदी म्हणाले

PM-KISAN योजनेच्या १७ व्या हप्त्याचा २०,००० कोटी रुपयांपेक्षा जास्त वितरणाद्वारे ९.२६ कोटी शेतकऱ्यांना फायदा होणार आहे. पॅरा एक्स्टेंशन वर्कर्स म्हणून काम करण्यासाठी कृषी सखी म्हणून प्रशिक्षित झालेल्या ३०,००० हून अधिक बचत गटांना प्रमाणपत्रे देण्यात आली.

या कार्यक्रमात उत्तर प्रदेशच्या राज्यपाल आनंदीबेन पटेल, मुख्यमंत्री योगी आदित्यनाथ, केंद्रीय कृषी मंत्री शिवराज सिंह चौहान आणि अनेक राज्यमंत्र्यांसह प्रमुख मान्यवर उपस्थित होते. कार्यक्रमातील शेतकऱ्यांना चांगल्या कृषी पद्धती, उदयोन्मुख तंत्रज्ञान, हवामानाला अनुकूल शेती आणि त्यांचे PM-KISAN लाभार्थी आणि पेमेंट स्टेटस कसे पडताळायचे याचे प्रशिक्षण देण्यात आले. त्यांना किसान-मित्र चॅटबॉट वापरण्याचे प्रशिक्षणही मिळाले.