Tej Police Times
Bride Died: मेहंदीला नवरीचा मृत्यू, नाचत असताना अचानक कोसळली, आई-वडिलांनी हंबरडा फोडला
नैनिताल: लेकीच्या लग्नाचा आनंद क्षणात मावळला आणि मांडवात पालकांनी हंबरडा फोडला. लग्नाच्या आदल्या दिवशी नवरीचा नाचत असताना अचानक मृत्यू झाल्याची धक्कादायक घटना घडली आहे. नैनिताल येथे डेस्टिनेशन वेडिंग दरम्यान ही नवरी नाचत होती आणि अचानक ती कोसळली, त्यानंतर तिला रुग्णालयान नेण्यात आले, मात्र तिथे उपचारादरम्यान तिचा मृत्यू झाला. हार्ट अटॅक आल्याने या तरुणीचा मृत्यू झाल्याची माहिती आहे. श्रेया जैन असं तिचं नाव असून ती दिल्लीची राहणारी होती.
श्रेयाचे लग्न लखनऊ येथे राहणाऱ्या एका तरुणासोबत निश्चित झाले होते. डेस्टिनेशन वेडिंगसाठी दोन्ही कुटुंब नैनितालमधील भीमतालजवळील एका रिसॉर्टमध्ये पोहोचले होते. घरातील सर्व सदस्य मेहंदी समारंभाचा आनंद घेत होते. श्रेया नाचत असताना अचानक तिला हृदयविकाराच्या झटका आला आणि तिचा मृत्यू झाला.
काही तासावर लग्न, त्यापूर्वी आक्रित घडलं
भीमताल येथील नौकुचियातल जवळील एका रिसॉर्टमध्ये ही घटना घडली. ज्या लेकीच्या डोक्यावर काही तासात अक्षता पडणार होत्या, तिच्यावर अंत्यसंस्कार करण्याची वेळ कुटुंबीयांवर आली.
दीड तास श्रेयाला वाचवण्याचे प्रयत्न, पण अखेर सारं निरर्थक
शनिवारी संध्याकाळी उशिरा मेहंदी सोहळ्यादरम्यान स्टेजवर डान्स करत असताना श्रेया अचानक बेशुद्ध पडली. श्रेया बेशुद्ध पडल्याने कुटुंबीय घाबरले. तिला तातडीने भीमतालच्या सीएचसीमध्ये नेण्यात आले. याठिकाणी रुग्णालयात डॉक्टरांनी दीड तास तिला वाचवण्यासाठी शर्थीचे प्रयत्न केले, मात्र तिला वाचवता आले नाही. अखेर उपचारादरम्यान तिचा मृत्यू झाला. याप्रकरणी भीमताल पोलिसांना कोणतीही कायदेशीर कारवाई करू नये, असे पत्र देऊन श्रेयाचे वडील डॉ. संजय जैन हे लेकीचा मृतदेह घेऊन परतले.
भीमताल पोलिस स्टेशनचे प्रभारी जगदीप नेगी यांनी सांगितले की, नवी दिल्लीतील द्वारका सेक्टर ६ अपार्टमेंटमध्ये राहणारे संजय जैन हे त्यांची मुलगी श्रेया जैन (२८) च्या लग्नासाठी कुटुंब आणि मित्रपरिवारासह नौकुचियाताल येथील एका रिसॉर्टमध्ये आले होते. श्रेया जैनचे लग्न लखनऊमध्ये राहणाऱ्या एका तरुणासोबत निश्चित झाले होते. दोन्ही कुटुंबातील लोक रिसॉर्टमध्ये थांबले होते आणि लग्नापूर्वीच्या कार्यक्रमादरम्यान ही घटना घडली.