Joe Biden: अमेरिकेचे राष्ट्राध्यक्ष बायडेन यांची घोषणा, निर्वासितांना मिळणार अमेरिकेचे नागरिकत्व, कोणाला लाभ? काय अटी?

वृत्तसंस्था, वॉशिंग्टन : अमेरिकेत कायदेशीर दर्जाशिवाय राहणाऱ्या लाखो निर्वासितांना दिलासा मिळू शकेल आणि त्यांना अमेरिकी नागरिकत्व मिळण्याचा मार्ग मोकळा होऊ शकेल, असे व्यापक पाऊल देशाचे अध्यक्ष जो बायडेन निवडणुकीच्या वर्षात टाकत आहेत. या महिन्याच्या सुरुवातीला सीमेवर बायडेन यांनी अवलंबलेल्या आक्रमक धोरणात समतोल साधण्याचा प्रयत्न म्हणून याकडे पाहिले जात आहे. बायडेन प्रशासन आगामी महिन्यांत अमेरिकी नागरिकांच्या कायदेशीर दर्जाशिवाय राहणाऱ्या काही जोडीदारांना कायमस्वरूपी रहिवास आणि अंतिमत: नागरिकत्वासाठी अर्ज करण्याची परवानगी देईल, अशी घोषणा ‘व्हाइट हाऊस’ने मंगळवारी केली.

कोणाला लाभ? काय अटी?

Tiger Reserve : सत्यमंगलम व्याघ्र प्रकल्पात व्याघ्र संख्येत आठपटीने वाढ, २००९ मध्ये होते केवळ १० वाघ

– या निर्णयामुळे जवळपास पाच लाखांपेक्षा अधिक निर्वासितांना लाभ होऊ शकतो, असे प्रशासनाच्या वरिष्ठ अधिकाऱ्यांनी केले अधोरेखित

– नागरिकत्व प्राप्त करण्यासाठी निर्वासिताने १७ जून, २०२४ रोजीपर्यंत किमान १० वर्षांपासून अमेरिकेत वास्तव्य केलेले असावे

– त्याचे अमेरिकी नागरिकाशी लग्न झालेले असावे

– अर्हताप्राप्त निर्वासिताचा अर्ज मंजूर झाला, तर त्याच्याकडे ग्रीन कार्डसाठी अर्ज करण्याकरीता तीन वर्षांचा कालावधी असेल

– त्याला किंवा तिला कामाचा हंगामी परवाना मिळेल

– यादरम्यान त्यांना हद्दपारीपासून संरक्षण मिळेल

५० हजार मुलांना लाभ

– आई-वडिलांपैकी एक अमेरिकी नागरिक असलेली सुमारे ५० हजार नागरिकत्व नसलेली मुले या प्रक्रियेसाठी पात्र ठरण्याची शक्यता

– दाम्पत्याच्या लग्नाला किती वर्षे झाली, हे विचारात घेतले जाणार नाही. परंतु १७ जून, २०२४नंतर लग्न केलेले यासाठी पात्र ठरणार नाहीत.

– या उन्हाळ्याच्या शेवटाला अर्ज सादर करण्याची प्रक्रिया सुरू होण्याचा अंदाज

– व्हाइट हाऊसमध्ये होणाऱ्या कार्यक्रमात मंगळवारी बायडेन त्यांच्या योजनेबद्दल बोलणार