Jalgaon: जळगावात राजकारण फिरलं! १३ नगरसेवकांची घरवापसी, भाजप पुन्हा बहुमतात

By tejpolicetimes On Oct 13, 2021

हायलाइट्स:

जळगावात शिवसेनेला भाजपचा चकवा
१३ बंडखोर नगरसेवकांची पुन्हा घरवापसी
जळगाव महापालिकेत भाजप पुन्हा बहुमतात

म. टा. प्रतिनिधी । जळगाव

भाजपविरोधात बंडखोरी करत सहा महिन्यांपूर्वी शिवसेनेसोबत गेलेल्या २७ फुटीर नगरसेवकांपैकी १३ जणांनी पुन्हा भाजपची वाट धरली आहे. त्यामुळं जळगाव महापालिकेतील (Jalgaon Civic Body) सत्तासमीकरणं बदलली असून भाजप पुन्हा बहुमतात आला आहे. या घडामोडींमुळं शिवसेना व राष्ट्रवादी काँग्रेसला धक्का बसला आहे. मात्र, महापौरपदावर दावा करण्याऐवजी विकासासाठी शिवसेनेला सोबत घेऊन काम करण्याची तयारी भाजपनं दाखवली आहे. (13 Corporators Join BJP)

जळगाव महापालिकेत मार्च महिन्यात झालेल्या महापौर व उपमहापौरपदाच्या निवडणुकीत भाजपचे २७ नगरसेवक फुटले होते. या फुटीर नगरसेवकांनी भाजपचा व्हीप झुगारून शिवसेनेच्या महापौरपदाच्या उमेदवार जयश्री महाजन यांना विजयी केले होते. तर फुटीरांमधून उमेदवार म्हणून कुलभुषण पाटील यांची उपमहापौरपदी निवड करण्यात आली होती. याचमुळे गेल्या काही दिवसांपासून फुटीर व भाजप नरगसेवक यांच्यात गटनेतेपदावरून वाद सुरू होता. भाजपने पलटवार करत चार दिवसांत एकूण १३ नगरसेवक पुन्हा भाजपमध्ये आणले आहेत. शनिवारी ३ नगरसेवकांची भाजपात वापसी झाल्यानंतर बुधवारी १० नगरसेवक पुन्हा भाजपमध्ये परतले. येत्या काही दिवसांत हा आकडा वाढण्याचा दावा देखील भाजपच्या पदाधिकाऱ्यांनी केला आहे.

वाचा: नाशिकमध्ये खळबळ! शिवसेना पदाधिकाऱ्याचे बेकायदा दारू कारखाने उद्ध्वस्त

भाजपमध्ये घरवापसी करणाऱ्यांमध्ये प्रतिभा पाटील, कांचन सोनवणे, रंजना सपकाळे, मीनाक्षी पाटील, दत्तात्रय कोळी, प्रवीण कोल्हे, मीनल सपकाळे, मनोज आहुजा, प्रिया जोहरे, रुखसानी गबलू खान या नगरसेवकांचा समावेश आहे. याआधी शनिवारी गिरीश महाजन यांच्या उपस्थितीत शोभा बारी, सुरेश सोनवणे व हसिनाबी शेख यांनी भाजपमध्ये प्रवेश केला होता.

शिवसेनेशी युती करण्याचे भाजपचे संकेत

भाजपनं २७ नगरसेवकांच्या बंडखोरीविरुद्ध नाशिक विभागीय आयुक्तांकडे अपात्रतेची याचिका दाखल केली आहे. आता त्यांच्याकडे आलेल्या या १३ नरगसेवकांना यातून दिलासा देण्यासाठी वरिष्ठ नेत्यांशी चर्चा करणार असल्याची माहिती भाजपचे जिल्हाध्यक्ष आमदार सुरेश भोळे यांनी दिली. १३ फुटिरांच्या घरवापसीमुळे भाजपचे महापालिकेत पुन्हा बहुमत झाले असले तरी महापौरपदावर दावा करण्यात आम्हाला रस नाही. शिवसेनेचे पदाधिकारी भाजप नेते गिरीश महाजन यांना भेटल्यास शहराच्या विकासासाठी त्यांच्यासोबत काम करण्याची तयारी आहे, असं सांगून भोळे यांनी शिवसेनेशी युतीचे संकेत दिले.

दोन बंडखोर नगरसेवकांना भाजपचा विरोध कायम

१३ नगरसेवकांची वापसी झाल्यानंतर आता बंडखोरांपैकी अजून काही नगरसेवक भाजपमध्ये येण्यास इच्छूक असल्याचा दावा भाजपकडून करण्यात आला आहे. येत्या दोन दिवसांत ही संख्या वाढण्याचीही शक्यता भाजपचे दीपक सूर्यवंशी यांनी व्यक्त केली आहे. सर्वच बंडखोर भाजपमध्ये येण्यास इच्छुक असले तरी दोन बंडखोरांसाठी भाजपचे दरवाजे कामयचे बंद असल्याचं पक्षानं स्पष्ट केलं आहे.

वाचा: शिवसेनेच्या ‘या’ निर्धारामुळं पुणे, पिंपरी-चिंचवडमध्ये राष्ट्रवादीला टेन्शन

Source link