Tej Police Times
मुंबईहून पुण्याला जाणाऱ्या ६ एक्सप्रेस रद्द, ६० लोकल फेऱ्याही रद्द, वाचा गाड्यांची यादी…
महेश चेमटे, मुंबई : गेल्या काही दिवसांपासून कोसळणाऱ्या पावसामुळे रेल्वे प्रवाशांची तारांबळ उडाली आहे. महामुंबईतील लोकलसह लांब पल्ल्यांच्या रेल्वेगाड्यांनाही याचा फटका बसला. मुसळधार पावसामुळे गुरूवारी ६० लोकल फेऱ्या रद्द करण्यात आल्या आहेत. बदलापूर-वांगणी दरम्यान रेल्वेरुळांवर पाणी आल्याने एकूण ६ मेल-एक्स्प्रेस रद्द करण्यात आल्या आहेत. शुक्रवारी मुंबई-पुणे दरम्यान धावणाऱ्या (१२१२७) इंटरसिटी (१२१२४) डेक्कन क्वीन, (१२१२६) प्रगती एक्स्प्रेस रद्द करण्यात आल्या आहेत.
बुधवार रात्रीपासून जोर धरलेला मुसळधार पाऊस शुक्रवारीही कायम होता. मुसळधार पावसामुळे शहरांतील रस्ते जलमय झाले होते. जोरदार वाऱ्यासह आलेल्या पावसामुळे शहरांसह उपनगरात दमदार हजेरी लावली. कमी दृश्यमानतेमुळे मध्य आणि हार्बर मार्गावर ६० लोकल फेऱ्या रद्द करण्यात आल्या.
लोकल रद्द झाल्याने प्रवाशांची रेल्वे स्थानकांवर गर्दी झाली होती. अनेक रेल्वे स्थानकांवर छताची कामे सुरू असल्याने छत काढून टाकण्यात आले आहे. यामुळे लोकल नसताना आडोश्याला आणि लोकल आल्यावर धावत धावत लोकल पकडताना प्रवाशांची दमछाक झाली होती. मुसळधार पावसामुळे मध्य, हार्बर आणि पश्चिम रेल्वेवरील लोकल फेऱ्या सुमारे २० ते २५ मिनिटे विलंबाने धावत होत्या.
Mumbai Rain Alert: सावधान! मुंबईत अतिमुसळधार पावसाची शक्यता, पुढील २४ तासांसाठी रेड अलर्ट
मुसळधार पावसामुळे लोकल प्रवाशांपाठोपाठ लांब पल्ल्यांच्या रेल्वेगाड्यांनी प्रवास करणाऱ्या प्रवाशांचे ही हाल झाले. बदलापूर-वांगणी दरम्यान उल्हास नदीचे पाणी रुळांवर आले होते. यामुळे वेगमर्यादेसह गाड्या धावत्या ठेवण्यात आल्या. १२१२३ छत्रपती शिवाजी महाराज टर्मिनस- पुणे डेक्कन क्वीन, १२१२५ सीएसएमटी-पुणे प्रगती आणि १२१२८ पुणे-सीएसएमटी इंटरसिटी या तीन एक्स्प्रेस रद्द करण्यात आल्या आहेत. सध्या उल्हास नदीच्या पाण्याची पातळी कमी झाली आहे. यामुळे सुरक्षित वेगमर्यादेसह मेल-एक्स्प्रेस सुरू आहे.
चार तास पनवेल-चौक दरम्यान वाहतूक बंद
मुसळधार पावसामुळे पनवेल आणि चौकदरम्यान रेल्वे रूळांवर पाणी साचले होते. यामुळे सकाळी ९.४२ वाजता रेल्वे वाहतूक बंद करण्यात आली होती. पूराचे पाणी ओसरल्यावर तब्बल चार तासानंतर दुपारी १.१० मिनिटांनी वाहतूक सुरू करण्यात आली. दरम्यान यामुळे १२१२६ पुणे-सीएसएमटी प्रगती एक्स्प्रेस पनवेल-कर्जत ऐवजी कल्याण-कर्जत मार्गे चालवण्यात आली होती.
घाटकोपर ते विक्रोळी दरम्यान संध्याकाळी ६ वाजता अप जलद मार्गावर रुळाला तडा. ६.२० मिनिटांनी तडा दुरुस्तीनंतर ३० किमीप्रतितास वेगाने लोकल वाहतूक सुरू करण्यात आली आहे.