तरुणाचा खून करून मृतदेह शेतात फेकला; एक आरोपी अटकेत, अन्य दोघांचा शोध सुरू

लातूर : औसा तालुक्यातील किल्लारी पोलीस ठाण्याच्या हद्दीत एका तरुणाचा मृतदेह कुजलेल्या अवस्थेत सापडला आहे. मृत तरुण हिंगोली जिल्ह्यातील असून तिघांनी त्याचा खून करून मृतदेह ऊसात फेकून दिला होता. या प्रकरणी पोलिसांकडून एका आरोपीला अटक करण्यात आली आहे.

बुधवारी पहाटे हा प्रकार उघडकीस आला असून महमद नूर औरंगपूर (वय ३५) असं मयत इसमाचं नाव आहे. तो हिंगोली येथील रहिवासी असून तो खासगी वाहन चालक म्हणून काम करत होता. त्याची चारचाकी गाडी भाड्याने घेऊन तिघेजण लातूर जिल्ह्यातील औसा तालुक्यात आले. चलबुर्गा शिवारात येताच त्यांनी महमद नूर औरंगपूरचा खून केला आणि त्याचा मृतदेह चलबुर्गा येथील शेतकरी चंदर जाधव यांच्या ऊसात फेकून दिला.

साताऱ्यात मेहुण्यानेच केला भावोजीचा खून? धक्कादायक घटनेनं जिल्ह्यात खळबळ

दरम्यान, महमद नूर औरंगपूर बेपत्ता असल्याची तक्रार त्याच्या कुटुंबियांनी हिंगोली पोलीस ठाण्यात नोंदवली होती. पोलिसांनी तपासाची चक्रे फिरवली आणि परळीच्या शिवाजी गणपत दशरथ (वय २४) याला ताब्यात घेतलं. पोलिसी खाक्या दाखवताच त्याने खुनाची कबुली दिली. आरोपीला घेऊन पोलिसांनी लातूर – किल्लारी पोलिसांशी संपर्क करत थेट ज्या परिसरात मृतदेह सापडला होता ते चलबुर्गा हे गाव गाठले. शिवारातील ऊसामधे फेकलेला मुतदेह त्यांना कुजलेल्या अवस्थेत सापडला. मृतदेह कुजल्याने त्याच्यावर लामजना येथे अंत्यसंस्कार करण्यात आले.

या प्रकरणाचा पुढील तपास हिंगोली पोलीस करत असून, फरार असलेल्या अन्य दोन आरोपींचा शोध घेतला जात असल्याची माहिती सपोनी सुनील गायकवाड व बीट जमादार सचिन उस्तूर्गे यांनी दिली.