तारा गावाजवळ महामार्गाच्या कडेला शुक्रवारी रात्री लाल रंगाची आलिशान ऑडी-क्यू३ ही गाडी आढळून आली होती. पोलिसांना याची माहिती मिळताच त्यांनी घटनास्थळी धाव घेत गाडीची पाहणी केली. यावेळी त्यात एकजण मृतावस्थेत आढळून आला. चार गोळ्या झाडून त्याची हत्या करण्यात आली होती. मृत व्यक्ती पुणे तळेगाव येथील ४४ वर्षीय संजय करले असल्याची ओळख पटल्याने तपासाला वेग देण्यात आल्याचे पोलीस पाटील अनिल पाटील यांनी सांगितले.
दुसरीकडे या घटनेची माहिती मिळताच पनवेल येथील पोलीस उपायुक्तांनी घटनास्थळाची पाहणी केली. यानंतर करले याचा मृतदेह मुंबईतील जे.जे. रुग्णालयात फॉरेन्सिक तपासणीसाठी पाठविण्यात आला. करले याच्यावर फसवणुकीचा गुन्हा दाखल असून गेल्या काही महिन्यांपूर्वी तो जामिनावर सुटला होता. याशिवाय बनावट सोन्याची नाणी विकल्याप्रकरणी त्याच्यावर गुन्हा दाखल असल्याचे निष्पन्न झाले आहे. तसेच इस्टेट एजंट आणि गाडी विकण्याचा व्यवसाय करणाऱ्या करलेवर मोक्का लावण्यात आल्याचे सूत्रांकडून सांगण्यात आले.
करलेच्या हत्येच्या तपासासाठी मुंबई-गोवा महामार्गावरील हॉटेल, रिसॉर्ट आणि मुंबई-पुणे महामार्गावरील सीसीटीव्ही फुटेज तपासण्यात येत आहे. याशिवाय शनिवारी सकाळी घटनास्थळावर रस्स्त्यालगतच्या झुडपात पुरावे शोधण्याचा प्रयत्नही करण्यात आला. करलेने ही ऑडी कार तेजस साळवे यांच्याकडून खरेदी केली असल्याची माहिती समोर आली आहे. दरम्यान, मागील दोन दिवसांपासून मुंबई-गोवा महामार्गालगत रस्त्याच्या कडेला उभी असलेली ही गाडी पोलिसांच्या गस्ती पथकाला कशी दिसली नाही, असा प्रश्न देखील विचारला जात आहे.