मोठ्या देशातील पोलिसांना गुंगारा, पण मराठमोळ्या अधिकाऱ्याच्या जाळ्यात सापडला, चार्ल्स शोभराजला झाली होती दोनदा अटक

मुंबईः कुख्यात सीरियल किलर चार्ल्स शोभराज (७८) याला तुरुंगातून मुक्त करण्याचा आदेश नेपाळच्या सर्वोच्च न्यायालयाने दिला आहे. शोभराज गेली १९ वर्षे नेपाळच्या तुरुंगात असून, आरोग्याच्या मुद्द्यावर त्याची सुटका करण्यात येत आहे. शोभराज याची सुटका करून त्यास १५ दिवसांत मायदेशी पाठविण्याचा आदेशही न्यायालयाने दिला आहे. चार्ल्स शोभराजची सुटका होत असताना त्याला पराकोटीचे धाडस दाखवून जेरबंद करणाऱ्या इन्स्पेक्टर मधुकर झेंडे यांचा पराक्रमाची गोष्ट पुन्हा एकदा सांगितली जात आहे.

कुख्यात सीरियल किलर चार्ल्स शोभराज याची तुरुंगातून सुटका होत असताना सत्तरच्या दशकात घडलेल्या गुन्हेगारी घटनांचा डोळ्यांसमोर येतात. बिकनी किलर या नावाने ओळखला जाणाऱ्या सिलिअर किलर चार्ल्स शोभराजला एका मराठी अधिकाऱ्याने पकडून दिलं होतं. चार्ल्सवर भारत, थायलंड, तुर्की आणि ईराण या देशात २०हून अधिक लोकांची हत्या करण्याचा आरोप होता. चार्ल्सच्या आयुष्यावर नेटफ्लिक्सवर द सर्पेंट डॉक्युमेंट्री व बॉलिवूडमध्ये मै और चार्ल्स नावाचा चित्रपटही बनवण्यात आला होता.

वाचाः चार्ल्स शोभराजची जेलमधून होतेय सुटका; भारतासह ९ देशांना डोकेदुखी ठरला होता बिकिनी किलर

कोण आहे चार्ल्स शोभराज

६ एप्रिल १९४४मध्ये व्हिएतनाममधील सायगॉन येथे चार्ल्सचा जन्म झाला. वडिल भारतीय सिंधी तर आई व्हितनामची होती. चार्ल्सच्या आई-वडिलांचे लग्न झाले नव्हते. लहान असतानाच त्याच्या वडिलांनी नाकारलं होतं. हा पहिला मानसिक आघात चार्ल्सवर झाला होता.

चार्ल्सने ३२ खून केल्याचा अनेक देशातील तपासयंत्रणांचा दावा आहे. अधिकाधिक हत्या या महिलांच्या केल्या असल्याचंही समोर आलं आहे. हत्या झालेल्या अनेक महिला या साधारण विशीतील होत्या. तर, त्यातले अनेक मृतदेह बिकनी परिधान केलेल्या महिलांचे होते. एकाच पद्धतीने या हत्या होत होत्या. अखेर देश-विदेशातील तपास यंत्रणांनी हे काम एखाद्या माथेफिरुचे असल्याचा निष्कर्ष काढला होता.

१९७०मध्ये चार्ल्स भारतात आला होता. भारतातही भारतातही त्याने अशाच पद्धतीने हत्या घडवून आणल्या. अखेर १९७१ साली मुंबई पोलिस दलातील अधिकारी मधुकर झेंडे यांनी त्याला पहिल्यांदा अटक केली होती. रायफल, रिव्हॉल्हर आणि इतर हत्यारे सापडली होती. मधुकर झेंडे यांनी पिस्तुलाच्या कॉर्डस वापरुन चार्ल्स शोभराजला ताब्यात घेतलं होतं. दरोड्याच्या प्राथमिक चौकशीनंतर त्याला दिल्ली पोलिसांच्या हवाली अटक करण्यात आली. परंतु, पोलिसांच्या हातावर तुरी देऊन पुन्हा एकदा चार्ल्स निसटला. महिनाभरातच चार्ल्स पळून जाण्यात यशस्वी ठरला.

वाचाः कुख्यात सिरीयल किलर चार्ल्स शोभराजच्या सुटकेचा आदेश; १५ दिवसांत मायदेशी पाठविणार

दरम्यान, चार्ल्सचा पुन्हा एकदा अटक करण्यात मधुकर झेंडे यांना यश आलं होतं. भल्या भल्यांना जे जमलं नाही ते मुधकर झेंडे यांनी करुन दाखवलं होतं. झेंडे यांनी १९८६मध्ये शोभराजला गोव्यात दुसऱ्यांदा अटक केली होती. गोव्यातील एका रेस्टॉरंटमध्ये झेंडेंनी शोभराजला ताब्यात घेतलं होतं. दुसऱ्यांदा अटक झाल्यानंतर त्यांच्यावर पुन्हा एकदा खटला चालवण्यात आला. भारतातून १९९७मध्ये शिक्षा भोगल्यानंतर चार्ल्स फ्रान्सला परत गेला.