जन्मदात्या आईला संपवलं; मृतदेह खोक्यात भरून माथेरान परिसरात फेकला, मुंबईतील उच्चभ्रू वस्ती हादरली

म. टा. खास प्रतिनिधी, मुंबई : जुहूतील उच्चभ्रू वस्तीत राहणाऱ्या ७२ वर्षीय वृद्धेची तिच्याच मुलाने घरात हत्या करून मृतदेह एका खोक्यात भरून माथेरान येथे नेला व तेथील डोंगरावरून फेकला. बिना कपूर असे मृत महिलेचे नाव असून जुहू पोलिसांनी तिचा मुलगा सचिन (४२) आणि नोकर छोटू मंडल यांना अटक केली आहे.

जुहू येथील सहाव्या रस्त्यावरील एका अपार्टमेंटमध्ये बिना कपूर या मुलगा सचिन याच्यासोबत राहत होत्या. त्यांचा दुसरा मुलगा अमेरिकेत आहे. दोन दिवसांपूर्वी अमेरिकेतील मुलाने बिना यांना फोन केला. त्या, तसेच भाऊ सचिनही फोन उचलत नसल्याने त्याने इमारतीच्या सुरक्षारक्षकाला फोन केला. बिना कपूर या घरी नसल्याचे त्याने सांगितले आणि त्यानंतर अमेरिकेतील मुलाने पुन्हा याबाबत सचिनला फोन केला. भावाच्या फोननंतर सचिनने आईचा शोध घेत असल्याचे भासवून जुहू पोलिस ठाण्यात आई हरवल्याची तक्रार दाखल केली.

कळव्यात शर्ट -पॅण्ट… मुंबईत साडी चोळी, चोरी करणाऱ्या तृतीयपंथींच्या नजरेने बनाव उघड

पोलिसांनी सीसीटीव्ही फूटेज तपासले असता बिना या स्वतः घराबाहेर पडताना दिसत नसल्याचे त्यांच्या लक्षात आले. तसेच, सचिन व्हीलचेअरवरून एक खोका आणून तो नोकर छोटू मंडल याच्या मदतीने कारमध्ये भरत असल्याचे फूटेजमध्ये आढळले. त्यामुळे पोलिसांनी सचिन आणि छोटू यांच्याभोवती चौकशीचा फास आवळला. चौकशीदरम्यान सचिन यानेच बॅटच्या साह्याने आईची हत्या करून मृतदेह माथेरान परिसरात नेऊन उंचावरून फेकला असल्याचे उघडकीस आले. संपत्तीच्या वादातून सचिन याने ही हत्या केल्याचा प्राथमिक अंदाज आहे. पोलिसांनी कर्जत येथून बिना कपूर यांचा मृतदेह ताब्यात घेतला आहे.

मी भारताच्या आणखी प्रेमात पडलेय, पण माझ्या मायदेशात…; कोरियन यूट्यूबरनं बोलून