त्याने माझा हात हातात घेतला अन्… शाहरुख खानसोबतची ती भेट सायली संजीवसाठी ठरलेली खास

मुंबई: अभिनेता शाहरुख खानचा ‘पठाण’ सिनेमा बॉक्स ऑफिसवर सध्या धुमाकुळ घालतो आहे. शाहरुखच्या या दमदार कमबॅकसाठी त्याचे चाहते उत्सुक होते. ४ वर्षांनी शाहरुख खान मोठ्या पडद्यावर परतत असल्याने अभिनेत्यासाठीच नव्हे तर त्याच्या चाहत्यांसाठीही हा सिनेमा खास होता. शाहरुखचा स्टारडम एवढा आहे की केवळ सामान्य प्रेक्षकच नव्हे अनेक सेलिब्रिटीही शाहरुखचे फॅन आहे. अभिनेत्री सायली संजीवही शाहरुखची जबरा फॅन आहे. अभिनेत्रीने स्वत: एका कार्यक्रमात शाहरुखच्या भेटीचा किस्सा सांगितलेला. दरम्यान आज सायलीच्या वाढदिवशी जाणून घेऊया एसआरके आणि तिची भेट कधी झालेली?

अभिनेत्री सायली संजीवने ‘बस बाई बस’ या कार्यक्रमात शाहरुखसोबतच्या भेटीचा किस्सा सांगितला होता. तिला यावेळी प्रश्न विचारण्यात आलेली की, प्रत्येक मुलीचं एक स्वप्न असतं की शाहरुखला एकदा तरी भेटावं आणि तू तर चक्क शाहरुखचा हात हातात घेऊन गप्पा मारल्यास. तर हे तू कसं जमवलंस?

हे वाचा-शिव ठाकरे जिंकणार का बिग बॉसची ट्रॉफी? ‘विजयी भवं शिव’ होतंय तुफान ट्रेंड

याचं उत्तर देताना सायली म्हणाली की, ‘माझ्या मित्राचं लग्न होतं. लग्न-रिसेप्शन झाल्यानंतर साधारण साडेबाराच्या दरम्यान मी निघाले. तेव्हा पहिल्यांदा असं जाणवलं की काहीतरी होणार आहे. त्यावेळी सर्व लिफ्ट बंद असल्याने मी त्याठिकाणीच अडकले. तीन-चार लिफ्ट बंद होत्या. तेव्हा समोरुन एक व्यक्ती चालत आली आणि आतमध्ये गेली. मी तेव्हा वेड्यासारखी बघतंच उभी राहिले होते.’

सायली म्हणाली, ‘शाहरुख माझ्या मित्राला आणि त्याच्या कुटुंबीयांना भेटून आला. त्यानंतर माझी त्याच्याशी ओळख करुन देण्यात आली आणि त्यावेळी माझा हात हातात घेऊन ते पूर्णवेळ माझ्याशी बोलले. मला काही आठवत नाहीये ते काय बोलले. मी फक्त एकटक बघत होते. नशिबाने कोणीतरी ते सर्व फोटो क्लिक केले. हातात हात धरुन, मिठी मारल्याचा असे पाच मिनिटांचे फोटो माझ्याकडे आहेत.’ हा अनुभव सांगताना सायलीच्या चेहऱ्यावरचा निखळ आनंद दिसत होता.

हे वाचा-‘तुझं वय सांगून गोची करणार नाही…’, केदार शिंदे यांनी केलेली पोस्ट ठरतेय चर्चेचा विषय

‘बस बाई बस’ या कार्यक्रमात सायली, शरद केळकर आणि हार्दिक जोशी ‘हर हर महादेव’ सिनेमाच्या प्रमोशनसाठी आले होते. तेव्हा सायलीने शाहरुखसोबतचा हा किस्सा सांगितला होता. सायली ज्या फोटोंबाबत बोलत आहे, त्यातील काही फोटो तिने तिच्या सोशल मीडियावर शेअर केले होते. SRK ला वाढदिवसाच्या शुभेच्छा देताना तिने हे फोटो पोस्ट केलेत.