बीड जिल्ह्यातील केज तालुक्यात असलेल्या दहिफळ गावातील सागराबाई विष्णू गदळे या मातेने हे पत्र लिहिलं आहे. आपल्या मुलाला मुख्यमंत्री एकनाथ शिंदे यांनी आमदार बनवावं, असा आशयाचं पत्र त्यांनी शिंदे यांच्या नावाने मंत्रालयात पाठवलं आहे. याच पत्राचे अनेक फोटो सध्या सोशल मीडियावर व्हायरल होत आहेत.
मुख्यमंत्र्यांना लिहिलेल्या पत्रामध्ये सागरबाई गदळे म्हणतात की, ‘माझ्या श्रीकांतने आत्तापर्यंत शेतकऱ्यांच्या प्रश्नांवर अनेक कामं केली आहेत, मात्र काही कामं करण्यासाठी पद नसल्यामुळे अनेक अडचणी त्याला येतात. माझ्या श्रीकांतला आमदार बनवा तो एक रुपया मानधनावर काम करण्यासाठी तयार आहे. आमदार बनवल्यानंतर माझा श्रीकांत हा शेतकऱ्यांच्या आत्महत्या कशा रोखायच्या, शेतकऱ्यांचे प्रश्न कसे सोडवायची, बेरोजगार तरुणांचे प्रश्न मार्गी लावायचे, हे दाखवेल.’
‘माझ्या श्रीकांतला काम करायचं आहे. माननीय मुख्यमंत्री एकनाथ शिंदे साहेब माझ्या श्रीकांतला गोरगरीब शेतकऱ्यांची सेवा करायची आहे त्यासाठी त्याला आमदार म्हणा, हीच माझी विनंती आहे, की तुम्ही त्याला आमदार केल्यानंतर तो नक्कीच आपण दिलेल्या आमदारकीचा योग्य वापर करेल’ अशा आशयाचे पत्र सागराबाई विष्णू गदळे या मातेने आपल्या मुलासाठी मुख्यमंत्र्यांना लिहिले आहे.
हेही वाचा : शुभांगी पाटलांचं बाळासाहेब ठाकरेंना अभिवादन, सत्यजित तांबेंनी न दिलेल्या प्रतिसादावरही भाष्य
याआधी देखील श्रीकांत गदळे यांनी शंभर रुपयाच्या बॉण्डवर मला आमदार केल्यानंतर मी एक रुपया मानधन घेऊन काम करेल अशा आशयाचा बोर्ड लिहिलेलं पत्र राज्यपालांना लिहिलं होतं. त्याआधी श्रीकांतने एक दिवसाचा मुख्यमंत्री बनण्याची देखील इच्छा व्यक्त केली होती, त्यावेळेस देखील बीड जिल्ह्यातील केज तालुक्यात असलेल्या दहिफळ या गावातील श्रीकांत महाराष्ट्रभर चांगलाच गाजला होता, आताही श्रीकांतच्या आईने थेट मुख्यमंत्र्यांना लिहिलेलं पत्र सध्या सोशल मीडियावर चांगलं व्हायरल झालेलं पाहायला मिळतंय.
हेही वाचा : अगोदर शाहांना स्पष्टीकरण,राष्ट्रपतींना पत्र लिहिण्याऐवजी मोदींना विनंती, कोश्यारींच्या मनात काय? चर्चा सुरु