‘मार्ड’ने मंगळवारी, दुसऱ्या दिवशीही संप सुरू ठेवल्याने काही शस्त्रक्रिया पुढे ढकलाव्या लागल्या व रुग्णांचे हाल झाले. बाह्य रुग्ण विभागातही रुग्णांच्या संख्येमध्ये सोमवारच्या तुलनेमध्ये मंगळवारी घट झाल्याचे दिसून आले. मार्ड’ने पुकारलेल्या संपाची दखल घेत वैद्यकीय शिक्षणमंत्री गिरीश महाजन यांनी मंगळवारी संध्याकाळी मार्डच्या पदाधिकाऱ्यांना बैठकीसाठी बोलविले होते. वरिष्ठ निवासी डॉक्टरांच्या १,४३२ जागा भरण्याचे तसेच, वैद्यकीय महाविद्यालयांमधील दुरवस्था झालेल्या वसतिगृहांची डागडुजी करण्यासाठी तातडीने निधी उपलब्ध करून देण्याचे आश्वासन या बैठकीमध्ये झालेल्या चर्चेमध्ये महाजन यांनी दिले. वसतिगृहात आवश्यक पायाभूत सुविधा उभारण्यासाठी केंद्र सरकारकडे पाठपुरावा करण्यात येणार असून त्यासाठी केंद्र सरकारकडे पाचशे कोटी रुपयांची मागणी करण्यात आली आहे. तसेच प्राध्यापकांच्या भरतीसंदर्भातही केंद्र सरकारशी बोलणी सुरू आहे. याबाबत लवकरात लवकर निर्णय घेण्यात येईल, असे आश्वासनही महाजन यांनी दिले. त्यानंतर ‘मार्ड’च्या पदाधिकाऱ्यांनी संप मागे घेण्याचा निर्णय जाहीर केला.
पालिका आयुक्तांशी चर्चा
राज्य सरकारच्या अख्त्यारित असलेल्या वैद्यकीय महाविद्यालयांबाबत गिरीश महाजन यांनी निर्णय घेतला. मात्र केईएम, नायर, सायन आणि कूपर ही रुग्णालये महापालिकेच्या अखत्यारीत येतात. या रुग्णालयांच्या वैद्यकीय महाविद्यालयांतील निवासी डॉक्टरांच्या मानधनात करोनाकाळात कपात करण्यात आली होती. या कपातीसंदर्भातील निर्णय मुंबई महापालिकेचे आयुक्त घेणार आहेत. पालिका आयुक्त इक्बाल सिंग चहल यांच्याशी या संदर्भात चर्चा करण्यात येणार आहे. बुधवारी दुपारी दोन वाजता डॉक्टरांना या चर्चेसाठी बोलावण्यात आले आहे. चहल यांनी मार्डच्या मागण्या पुढील दोन दिवसांत पूर्ण केल्या जातील असे म्हटले आहे. त्यानंतरही महापालिकेकडून मागण्या मान्य न झाल्यास महापालिका आयुक्त आणि मुख्यमंत्री यांच्यात चर्चा घडवून आणण्याचे आश्वासनही महाजन यांनी दिले.
मार्डचा संप अखेर मागे; वैद्यकीय शिक्षणमंत्री गिरीश महाजन यांचे मागण्या पूर्ण करण्याचे आश्वासन
म. टा. विशेष प्रतिनिधी, मुंबईः निवासी डॉक्टरांनी आपल्या विविध प्रलंबित मागण्यांसाठी मागील दोन दिवसांपासून पुकारलेला संप मंगळवारी रात्री उशिरा मागे घेतला. वैद्यकीय शिक्षणमंत्री गिरीश महाजन आणि ‘मार्ड’च्या पदाधिकाऱ्यांमध्ये झालेल्या बैठकीमध्ये महाजन यांनी सर्व मागण्या पूर्ण करण्याचे आश्वासन दिल्याने संप मागे घेत असल्याचे ‘मार्ड’कडून जाहीर करण्यात आले.