शाहरुख खानच्या ‘पठाण’ नावाच्या वादळातही रितेशच्या ‘वेड’चा बोलबाला! पाचव्या शुक्रवारी लाखोंचा गल्ला

मुंबई: शाहरुख खानचा ‘पठाण’ प्रदर्शित झाला अन् या सिनेमाने इतर सर्व सिनेमांचे धाबे दणाणून सोडले. मराठी सिनेविश्वातही मोठी कमाई करणाऱ्या ‘वेड’लाही पठाणचा फटका बसला. कोट्यवधींच्या घरात ‘वेड’ची कमाई होत होती, मात्र पठाणच्या रीलिजनंतर सिनेमाच्या कमाईत घसरण झाली आहे. असे असले तरीही अद्यापही रितेश देशमुखचा ‘वेड’ थिएटरमध्ये आहे. एकूण ३० दिवस रितेशचा वेड सिनेमागृहांमध्ये आहे. रीलिजनंतरच्या २९ व्या दिवशी (पाचवा शुक्रवार) २७ जानेवारी रोजी ‘वेड’ सिनेमाने २४ लाखांची कमाई केली. यानंतर ‘वेड’चे एकूण बॉक्स ऑफिस कलेक्शन ५७.१५ कोटीवर पोहोचले आहे.

चौथ्या आठवड्यातही दमदार कमाई

‘वेड’ सिनेमा आता पाचव्या आठवड्यातही बऱ्यापैकी कमाई करेल अशी अपेक्षा व्यक्त केली जातेय. कारण प्रदर्शित झाल्यानंतर पहिल्या चार आठवड्यात सिनेमाने कोट्यवधींची कमाई केली. पहिल्या आठवड्यात रितेश-जिनिलिया देशमुखच्या ‘वेड’ सिनेमाचे कलेक्शन २०.६७ कोटी होते, दुसऱ्या आठवड्यात हा आकडा २०.१८ कोटी असा होता. तिसऱ्या आणि चौथ्या आठवड्यात ‘वेड’ने अनुक्रमे ०९.९५ कोटी आणि ६.११ कोटींची कमाई केली. आता पाचव्या आठवड्यातही सिनेमागृहांमध्ये ‘वेड’ काही प्रमाणात कलेक्शन करेल का हे पाहणे महत्त्वाचे ठरेल.

हे वाचा-उर्फी जावेदचा आता असा हट्ट! थेट शाहरुख खानलाच म्हणाली- ‘मला दुसरी बायको कर…’

काय आहे चौथ्या आठवड्यातील कमाई?

वेड सिनेमाने चौथ्या आठवड्यातील शुक्रवारी ०१.३५ कोटी, शनिवारी १.३७ कोटी तर रविवारी १.७० कोटींची कमाई केली. चौथ्या आठवड्यातील सोमवारपासून बॉक्स ऑफिस कलेक्शनमध्ये काहीशी घसरण पाहायला मिळाली. सोमवारी सिनेमाने ५२ लाखांचा गल्ला जमवला. मंगळवारी ४१ लाख, बुधवारी २१ लाख, गुरुवारी ५५ लाख अशी कमाई या सिनेमाने केली. तर पाचव्या आठवड्यातील शुक्रवारी सिनेमाने २४ लाख कमावले आहेत. वीकेंडचा फायदा ‘वेड’ला झाल्यास एकूण गल्ला ६० कोटींपर्यंत पोहोचण्याची शक्यता आहे.

बसला ‘पठाण’चा फटका?

२५ जानेवारी रोजी शाहरुख-दीपिका पादुकोण स्टारर ‘पठाण’ सिनेमा प्रदर्शित झाला. मुंबईतील विविध चित्रपटगृहांमध्ये पठाणचे ४-५ शो लावण्यात आले आहेत. ‘वेड’चा मात्र एखादा शो थिएटरमध्ये आहे. काहीच थिएटर्स अशी आहेत जिथे रितेशच्या ‘वेड’चे दोन शो आहेत.

हे वाचा-प्रमोशन न करता ३०० कोटी कसे कमावले? शाहरुख खानने सांगून टाकली स्ट्रॅटर्जी!

‘सैराट’नंतर सर्वाधिक कमाई करणारा दुसरा सिनेमा

मराठी सिनेविश्वात ‘सैराट’ या सिनेमाने सर्वाधिक कमाई केली. मीडिया रिपोर्टनुसार नागराज मंजुळेच्या या सिनेमाचे वर्ल्डवाइड कलेक्शन ११० कोटींचे आहे. आता ‘वेड’ हा सैराटनंतर मराठीमध्ये सर्वाधिक कमाई करणारा सिनेमा ठरला आहे. रितेश-जिनिलिया या जोडीला पुन्हा एकदा एकत्र पाहता आल्याने चाहत्यांनी सिनेमाला उदंड प्रतिसाद दिला. शिवाय सिनेविश्वात असे पहिल्यांदाच घडताना दिसले की एखाद्या सिनेमाध्ये रीलिजनंतर काही दिवसांनी नवीन सीन जोडण्यात आले. शिवाय एक गाणेही सिनेमामध्ये नंतर जोडण्यात आले. २० जानेवारीपासून थिएटरमध्ये ‘वेड’चे नवीन व्हर्जन प्रदर्शित करण्यात आलेले. चाहत्यांनी या पहिल्यांदाच घडलेल्या प्रयोगालाही चांगला प्रतिसाद दिला.