हा किस्सा लंडनचा आहे जेव्हा ते मित्रांसोबत लंडनला गेले होते. लंडनवारीचा हा किस्सा सांगताना नागराज म्हणाले, ‘मी भारतात कधीही फाइव्ह स्टार हॉटेलमध्ये राहिलो नाही पण लंडनमध्ये गेल्यावर तिथे मोठ्या हॉटेलमध्ये थांबलो. मी आणि माझे दोन मित्र तिथे होतो. स्टुडिओ अपार्टमेंट सारखी रूम होती. रोज सकाळी उठल्यावर ते दोघे चहा बनवायचे आणि नाश्ता करून आम्ही चित्रपट महोत्सवासाठी जायचो. एके दिवशी ते दोघे मित्र खोलीत आलेच नाहीत. मग मी स्वतः चहा बनवायला घेतला. तिथे चहा बनवण्यासाठी इलेक्ट्रिक टी मेकर होता. त्याआधी मी कधीही असं काही वापरलं नव्हतं. पण म्हटलं प्रयत्न करू. मी त्या टी मेकरमध्ये पाणी टाकलं. प्लग लावला, बटण चालू केलं आणि तो उचलून गॅसवर ठेवला. थोड्या वेळाने पाहिलं तर त्या टी मेकरमधून धूर येत होता.’
ते पुढे म्हणाले, ‘पुढच्या क्षणाला खोलीतला सायरन वाजायला लागला. त्याबरोबर हॉटेलमधली मंडळी धावत माझ्या खोलीत आली. काय झालं, कुठे आग लागली असा प्रश्न त्यांच्या चेहऱ्यावर होता. मला इंग्रजी येत नव्हतं मग त्यांना काय सांगणार? त्यांनी समजून घेतलं. त्यांनी मला नवा टी मेकर आणून दिला शिवाय तो वापरायला पण शिकवलं.’ त्यांचा हा मजेशीर किस्सा ऐकून तिथे उपस्थित सगळेच हसू लागले.