मुंबई: टेलिव्हिजनवर संस्कारी, साध्या-सरळ सुनेच्या भूमिकेत असणाऱ्या अभिनेत्री खऱ्या आयुष्यात अनेकदा डॅशिंग अन् दबंग असतात. असाच काहीसा अवतार अभिनेत्री दिव्यांका त्रिपाठी दहियाचा पाहायला मिळाला. दिव्यांकाने ‘ये है मोहब्बतें’, ‘बनू मैं तेरी दुल्हन’ अशा विविध मालिकांमध्ये साध्या-सरळ सुनेची भूमिका साकारली आहे. या भूमिकांवर प्रेक्षकांनी विशेष प्रेमही केले. खऱ्या आयुष्यात मात्र दिव्यांका त्रिपाठीचे व्यक्तिमत्व काहीसे वेगळे आहे. ती स्पष्टवक्ती तर आहेच पण ती तितकीच साहसीही आहे. ‘खतरों के खिलाडी’मध्ये दिव्यांका डॅशिंग अवतारात दिसली होती, मात्र अभिनेत्रीने मुंबईच्या रस्त्यावर फर्राटेदार बाइक चालवत तिच्या साहसी वृत्तीचा प्रत्यय पुन्हा एकदा करवला.
हे वाचा-प्रवीण तरडेंचा आणखी एक ‘खतरनाक’ लूक! मराठ्यांची सीमेपलीकडील शौर्यगाथा मांडणारा नवा सिनेमा
दिव्यांकाने अलीकडेच तिच्या इन्स्टाग्राम अकाउंटवर काही फोटो आणि व्हिडिओ शेअर केले आहेत. ज्यामध्ये ती मुंबईच्या रस्त्यावर बाइक चालवता दिसली. तिने जे फोटो शेअर केलेत त्यामध्ये अभिनेत्री लग्झरी क्रुझर बाइकवर स्वार झाली आहे. काळ्या रंगाचं जॅकेट, काळी जीन्स, बायकर्स बुट्स आणि हेल्मेट अशा बायकर स्वॅगमध्ये यावेळी दिव्यांका दिसली. यावेळी अभिनेत्रीसोबत तिचा नवरा अभिनेता विवेक दहियाही आहे. त्यानेही बायकर लूकमध्ये पत्नीसोबत बाइक चालवली. या दोघांचे फोटो आणि व्हिडिओ सध्या सोशल मीडियावर व्हायरल होतायंत.
हे वाचा- महेश मांजरेकरांचं घातलं प्रतीकात्मक श्राद्ध; दिग्दर्शकाविरोधात जोरदार घोषणाबाजी
दरम्यान अभिनेत्रीने तिच्या नवऱ्यासोबत शेअर केलेल्या फोटो-व्हिडिओंचे विशेष कौतुक होतंय. या जोडप्याचा एक चाहतावर्ग आहे, त्यांच्या विशेष कमेंट्स या पोस्टवर येतायंत. विवेक-दिव्यांका एक कपल म्हणून एकमेकांसाठी किती योग्य आहेत, अशा आशयाच्या कमेंट्स त्यांचे चाहते करतायंत. अभिनेत्रीने ही पोस्ट शेअर करताना दिलेलं कॅप्शनही लक्ष वेधून घेणारं आहे. तिने लिहिलं की, ‘एकत्र बाइक चालवा, एकत्र राहा!’ दिव्यांकाने स्वत:ला आणि विवेकला ‘रायडर कपल’ म्हटलं आहे. #RiderCouple असा हॅशटॅग तिने पोस्टमध्ये वापरला.
अभिनेत्रीने काही दिवसांपूर्वीही बाइक राइड करताचा एक व्हिडिओ शेअर केला होता. ज्यामध्ये ती एखाद्या प्रोफेशनल रायडरप्रमाणे बाइक चालवत आहे. तिने कॅप्शनमध्ये दिलेल्या माहितीनुसार ही बाइक तिने स्वत:लाच गिफ्ट म्हणून दिली. स्वत:ची बाइक घेण्याचं स्वप्न पूर्ण झाल्यानंतर अभिनेत्रीचा आनंद गगनात मावेनसा झालेला.