‘कांतारा’ पाहिल्यानंतर अनेकांना या कथेचा पुढचा भाग येणार का, त्यात काय दाखवलं जाईल, असा प्रश्न पडला होता. मात्र आता ऋषभने ‘कांतारा’चा दुसरा भाग येणार असल्याचं म्हटलं आहे. त्याने ‘कांतारा २’ची घोषणा केली आहे. मात्र त्यातही एक ट्विस्ट आहे. ‘कांतारा २’ हा ‘कांतारा’चा पुढचा भाग नसून मागचा भाग असणार आहे. ‘कांतारा २’मध्ये चित्रपटाचा आधीचा भाग दाखवण्यात येणार आहे. ऋषभने केलेल्या घोषणेनुसार, दुसऱ्या भागात दैवबद्दल दाखवण्यात येणार आहे. हा चित्रपट २०२४ मध्ये प्रदर्शित होणार आहे. नुकतेच ‘कांतारा’ने चित्रपटगृहात १०० दिवस पूर्ण केले. त्यानिमित्ताने दिलेल्या पार्टीमध्ये ऋषभने ही घोषणा केली आणि म्हटलं की, त्याने ‘कांतारा’च्या प्रीक्वलची कथा लिहायला सुरुवात केली आहे. पण हा मागचा भाग असणार आहे. ही कल्पना मला कांताराच्या चित्रीकरणादरम्यान आली. सध्या आम्ही त्यावर काम करत आहोत आणि आणखी खोलवर संशोधन करत आहोत. त्यामुळे आता काही सांगणं घाई असेल.’
‘कांतारा’ची कथा दैवा कोलाभोवती फिरते. ही कथा १८४७ मधील मंगळूरच्या राजाची आहे, ज्याला आपल्या घरात शांतता हवी आहे आणि म्हणून तो गावकऱ्यांकडे स्थानिक देवता पंजुर्लीची मूर्ती मागतो. पंजुर्ली हा भगवान विष्णूचा अवतार मानला जातो आणि कन्नड लोक त्याची पूजा करतात. कर्नाटकात पंजुर्ली देवता अत्यंत मानाची आहे. येथील लोक भूत कौला उत्सवादरम्यान भगवान पंजुर्ली म्हणून वेशभूषा करतात आणि नंतर त्यांना प्रार्थना करतात. ‘कांतारा’ ३ सप्टेंबर २०२२ मध्ये प्रदर्शित झाला होता.