आपल्या अभिनयाची परीक्षा पाहण्यासाठीच जणू हा अभिनेता थेट सावंतवाडीला पोहोचलाय. सावंतवाडी येथील उपरलकर देवस्थान येथे सादर होणाऱ्या दशावताराच्या खेळात हा अभिनेता चक्क राक्षस झाला आहे. त्याचे फोटो आणि व्हीडिओ सध्या सोशल मीडियावर व्हायरल होत आहेत. हा अभिनेता दुसरा तिसरा कुणी नसून मराठमोळे अभिनेते महेश कोठारे यांचा मुलगा आदिनाथ कोठारे आहे. आदिनाथ चक्क या दशावताराच्या खेळात सहभागी होण्यासाठी सावंतवाडीला पोहोचला आहे. सध्या कोकणात आंगणेवाडीची जत्रा सुरू आहे. या निमित्ताने अनेक ठिकाणी अशी नाटकं सादर केली जातात. अशाच एका नाटकात आदिनाथ राक्षसाच्या भूमिकेत दिसत आहे. त्याने राक्षसाचा वेष परिधान केला आहे. जांभळं धोतर, लाल जॅकेट, चेहऱ्यावर मोठीशी मिशी, लाल डोळे आणि कपाळावर मोठासा गंध अशा अवतारात आदिनाथ सगळ्यांसमोर खेळ सादर करत आहे.
त्याचा हा व्हिडिओ अनेक ठिकाणी व्हायरल झाला आहे. त्याच्या व्हिडिओवर अनेक नेटकरी भरभरून प्रतिसाद देत आहेत. आता तू खऱ्या अर्थाने अभिनय शिकलास, हीच खरी रंगभूमीची सेवा, प्रत्येक कलाकाराने हा अनुभव एकदा तरी घ्यायलाच हवा, तुझ्यासारखे मोठे कलाकार दशावतार सादर करतील तर तो आणखीनच मोठा होईल, अशा अनेक प्रतिक्रिया सध्या नेटकरी देत आहेत.
लोकप्रिय अभिनेत्याला पडली सावंतवाडीच्या दशावताराची भुरळ; नेटकरी म्हणाले- आता खरो जगलंस!
मुंबई- कोकणच्या निसर्गरम्य सौंदर्याची भुरळ तर सगळ्यांनाच पडते. येवा कोकण आपलोच असा असं म्हणत कोकणी माणूसही सगळ्यांचं प्रेमाने अगत्य करतो. तिथल्या नारळी पोफळीच्या बागा, समुद्रकिनारे या सगळ्यांचीच आवड निर्माण होते. पण एक अशी गोष्ट आहे ज्याशिवाय कोकण पूर्ण होऊ शकत नाही. ते म्हणजे कोकणातले दशावताराचे खेळ. कोकणातले दशावतारातले खेळ हा तिथे राहणाऱ्या प्रत्येकाच्या आयुष्याचा एक भाग आहे. बालपणीपासूनच हे खेळ पाहत तिथले स्थानिक होतात. मात्र शहरांमध्ये राहणाऱ्यांना त्याचं फार अप्रूप वाटतं. अशीच या दशावताराच्या खेळाची भुरळ एका लोकप्रिय अभिनेत्यालादेखील पडली आहे. महत्वाचं म्हणजे हा अभिनेता खेळात सहभागीदेखील झालाय. तुम्ही ओळखलंत का या कलाकाराला?