मैत्री काय असते आणि मित्र काय करू शकतात याचं डोळे उघडवणारं आणि मित्रांचं प्रेम पाहून डोळे पाणावणारं एक उदाहरण सामोरं आलं आहे. नितीन यांच्या जाण्यानंतर देखील आपल्या मैत्रीतील ओलावा जपण्यासाठी नितीन शिंदे यांच्या कुटुंबीयांना मदत करण्याचं त्यांच्या मित्रांनी ठरवलं. पुणे पोलीस दलातील २००७ च्या बॅच मधील पोलिसांनी १,००० पासून ते १०,००० रुपयांपर्यंत मदत जमा केली.
एकमेकांना सोशल मीडियावरुन आवाहन करत अवघ्या १० दिवसात ११ लाख रुपये रक्कम जमा झाली आहे. ही सर्व रक्कम नितीन यांच्या मुलींसाठी फिक्स डिपॉजिटमध्ये ठेवली जाईल. नितीन आमच्या ह्रदयात कायम राहील या भावनेने या मित्रांनी एकत्र येत हा उपक्रम राबवला आहे.
नितीन शिंदे यांच्या अचानक जाण्याने पोलीस दलात हळहळ व्यक्त केली जात आहे. एक उमदा व चांगला सहकारी अपघाती निधनात गेल्याची दुःखद भावना पोलिसांकडून व्यक्त केली जात आहे. शिंदे हे कुटुंबातील कर्ते होते. त्यांच्या पश्चात आई, वडील, भाऊ, पत्नी व मुली संस्कृती (वय 13 ) व गिरीजा (वय ११) असा परिवार आहे. नितीन शिंदे यांच्या जाण्याने कुटुंबावर दुःखाचा डोंगर कोसळला असून, कुटुंबीयांचा आक्रोश मन हेलावून टाकत आहे.
नितीन दिलीप शिंदे हे पोलीस नाईक या पदावर हडपसर पोलीस स्टेशनला काही काळ कार्यरत होते. ते एक उत्कृष्ट खेळाडू होते. ॲथलेटिक्स प्रकारात ते उत्कृष्ट रनर होते. पुणे शहर पोलीस स्टेशनला कार्यरत असताना विविध गुन्ह्यातील त्यांचा आरोपी पकडण्यात त्यांचा मोठा सहभाग होता.