बँक खात्याचे क्रमांक न जुळल्यामुळे गुणवंत विद्यार्थ्यांना बक्षिसाच्या रक्कमेपासून वंचित राहावे लागले आहे. बँकेने रक्कम जमा करून न घेता रक्कमेचा धनादेश महापालिकेच्या प्रशासनाला परत केला आहे. आता विद्यार्थ्यांच्या बँक खात्याचे नवे क्रमांक मिळवण्याचे काम पालिकेच्या महिला बालकल्याण विभागाकडून सुरू करण्यात आले आहे.
महापालिका शाळेतील ज्या विद्यार्थ्यांनी इयत्ता दहावीच्या परीक्षेत ८० टक्के किंवा त्यापेक्षा जास्त गुण मिळवले आहेत त्यांना रोख बक्षीस देऊन गौरविण्याचा निर्णय पालिका प्रशासनाने घेतला आहे. दहावीच्या २०२१-२२ या वर्षी झालेल्या परीक्षेत ८० टक्के आणि त्यापेक्षा जास्त गुण मिळवलेल्या १२२ विद्यार्थ्यांना रोख बक्षीस देण्याचा निर्णय घेऊन महिला आणि बालकल्याण विभागाच्या माध्यमातून त्यासाठी तरतूद करण्यात आली.
त्याचप्रमाणे ९६ ते १०० टक्के गुण मिळवलेल्या विद्यार्थ्यांना २५ हजार रुपयांचे बक्षिस देण्याचे जाहीर करण्यात आले. केवळ एका विद्यार्थ्याला एवढे गुण मिळाले आहेत. ९१ ते ९५ टक्के गुण मिळवलेल्या चार विद्यार्थ्यांना प्रत्येकी २० हजार रुपये, ८६ ते ९० टक्के गुण मिळवलेल्या २९ विद्यार्थ्यांना प्रत्येकी पंधरा हजार रुपये तर ८० ते ८५ टक्के गुण मिळवलेल्या ८८ विद्यार्थ्यांना प्रत्येकी दहा हजार रुपये रोख बक्षीस देण्याचे पालिका प्रशासनाने जाहीर केले. त्यानुसार महिला आणि बालकल्याण समितीच्या सहा कोटी रुपयांच्या निधीतून गुणवंत विद्यार्थ्यांच्या बक्षिसांसाठी १४ लाख २० हजार रुपयांची तरतूद करण्यात आली.
सुत्रांनी दिलेल्या माहितीनुसार पालिकेच्या प्रशासनाने १४ लाख २० हजार रुपयांचा एकच धनादेश तयार केला, त्याच्या सोबत १२२ विद्यार्थ्यांच्या नावाची यादी जोडली आणि ती बँकेत पाठवली. यादीमध्ये विद्यार्थ्याचे नाव त्याचा बँक खाते क्रमांक नमूद करण्यात आला होता. बँकेकडे ही यादी गेल्यावर बँकेच्या अधिकाऱ्यांनी यादीनुसार बँकखाते क्रमांकाची पडताळणी केली.
या पडताळणीत बऱ्याच विद्यार्थ्यांचे बँक खाते क्रमांक चुकीचे असल्याचे लक्षात आले. त्यामुळे बँकेने धनादेश पालिकेला परत पाठवला. ज्या विद्यार्थ्यांचे बँक खाते क्रमांक जुळले नाहीत त्या विद्यार्थ्यांशी संपर्क साधून त्यांचे नवीन बँक खाते क्रमांक घेण्याची प्रक्रिया पालिकेच्या शिक्षण विभागाकडून सुरू करण्यात आली आहे. सर्व विद्यार्थ्यांचे अचूक बँक खाते क्रमांक प्राप्त झाल्यावर पुन्हा एकदा तो धनादेश बँकेत पाठवला जाणार आहे.