लगिनघटिका समिप! करण जोहरची ती पार्टी ठरली सिद्धार्थ-कियारासाठी खास; कधी सुरू झाली लव्ह स्टोरी?

Kiara Advani Siddharth Malhotra Wedding Bells: व्हॅलेंटाइन वीक सुरू होण्यासाठी अवघे काही तास शिल्लक राहिलेत आणि बॉलिवूडच्या रोमँटिक कपलच्या लग्नासाठीही काहीच तास शिल्लक राहिले आहेत. कोट्यवधी तरुणांच्या हृदयावर अधिराज्य गाजवणारी अभिनेत्री कियारा आडवाणी आणि बॉलिवूडमधील ‘मुंडा कुक्कड कमाल दा’ सिद्धार्थ मल्होत्रा येत्या ६ फेब्रुवारी रोजी लग्नबंधनात अडकणार आहेत. जैसलमेरमधील आलिशान सूर्यगड पॅलेसमध्ये कियारा-सिद्धार्थ नातेवाईक आणि जवळच्या मित्रमंडळींच्या उपस्थितीमध्ये लग्न करणार आहेत. ४ फेब्रुवारी रोजी दोघांच्या लग्नसोहळ्याच्या आधीचे विधी सुरू झाले असून दोघांच्या लग्नसोहळ्यासाठी अमिताभ बच्चन, शाहरुख खान, शाहीद कपूर, वरुण धवन हे कलाकार सहभागी होणार असल्याची चर्चा आहे. या लग्नसोहळ्याला येणाऱ्या पाहुण्यांसाठी पॅलेसमध्ये ८४ आलिशान खोल्या बुक करण्यात आल्या असून शाही पद्धतीने हे लग्न होईल.

कधीपासून झाली प्रेम कहाणीला सुरुवात?

सिद्धार्थ आणि कियाराच्या चाहत्यांसाठी त्याचं लग्न खूप खास असणार आहेत. दोघांच्या लग्नसोहळ्यासाठी चाहते कमालीचे उत्सुक आहेत. कियारा-सिद्धार्थ एकमेकांना डेट करत असल्याची बातमी आल्यानंतर त्या दोघांचे चाहते खूप उत्साहित होते. कियारा आणि सिद्धार्थनं ‘शेरशाह’ सिनेमात एकत्र काम केलं होतं. त्या दोघांची जोडी प्रेक्षकांना खूपच आवडली होती. यानंतर प्रत्यक्षात त्यांनी एकमेकांना आयुष्याचे जोडीदार म्हणून स्वीकारावं अशी अनेकांनी इच्छा व्यक्त केली होती. प्रत्यक्षात तसं घडल्यावर चाहते आनंदित झाले. मात्र तुम्हाला माहितेय का कियारा आणि सिद्धार्थच्या प्रेमकहाणीला ‘शेरशाह’ नव्हे तर त्या आधीपासूनच सुरुवात झालेली.

मैत्रीही झाली फिल्मी स्टाइलमध्ये

जसं सिनेमामध्ये होतं की हिरो-हिरॉइन पार्टीमध्ये भेटतात, त्यांच्यात आधी मैत्री आणि नंतर प्रेम होते. या प्रेमाचं रुपांतर लग्नबंधनात होतं. सिद्धार्थ आणि कियारा यांच्या प्रेमकहाणीलाही अशीच सुरुवात झाली. सिद्धार्थ हा कलाकार म्हणून लोकप्रिय झाला होता तर कियारा स्ट्रगल करत होती. त्यावेळी कियारा तिच्या ‘लस्ट स्टोरी’ या नेटफ्लिक्सच्या शॉर्ट फिल्म सीरिजमध्ये काम करत होती, याच्या रॅपअप पार्टीमध्ये सिद्धार्थ-कियारा पहिल्यांदा भेटले.

पहिली भेट होती खास

कियारानं कॉफी विथ करण कार्यक्रमात सांगितलं की, सिद्धार्थला ती शेरशाह सिनेमाच्या आधीपासून ओळखत होती. त्यांची पहिली भेट करण जोहर दिग्दर्शित लस्ट स्टोरी सीरिजच्या रॅपअप पार्टीमध्ये झाली होती. त्यावेळी ते एकमेकांशी पहिल्यांदा बोलले. ती अतिशय औपचारिक भेट होती. परंतु ही भेट कियारासाठी खूपच खास होती. त्याच पार्टीमध्ये करण जोहर देखील होता. कियारानं पुढं सांगितलं की, ती रात्री कधीच विसरू शकत नाही. कारण तेव्हापासूनच त्यांच्या मैत्रीला सुरुवात झाली होती.

त्या फोटोंची झाली चर्चा

त्यानंतर कियारा आणि सिद्धार्थ यांची निवड शेरशाह सिनेमासाठी झाली. त्यावेळी कियारा ‘कबीर सिंह’ सिनेमामुळे चर्चेत आली होती. सिद्धार्थ आणि कियाराच्या अफेअरच्या चर्चांमुळे त्यांना मोठ्या पडद्यावर एकत्र पाहण्यासाठी चाहते खूप उत्सुक होते. दरम्यानच्या काळात सिद्धार्थ कियारा एकमेकांचे चांगले मित्र झाले होते. ‘शेरशाह’ सिनेमाच्या निमित्तानं त्या दोघांमध्ये जवळीक निर्माण झाल्याच्या बातम्या येऊ लागल्या होत्या. त्या चर्चा सुरू असतानाच २०२० मध्ये नव्या वर्षाचं स्वागत करताना त्यांचे काही फोटो समोर आलेले. दक्षिण आफ्रिकेतील त्या हॉलिडे स्पेशल त्या फोटोंमुळे त्यांच्या नात्याच्या चर्चा वाढल्या.

चाहत्यांनी बांधला अंदाज

खरं तर त्यांनी त्यांनी हे एकेकट्याचे फोटो शेअर केले होते. परंतु दोघांच्या फोटोतील ठिकाण एकच होते. त्यामुळे नेटकऱ्यांनी या दोघांनी एकत्रितपणे सुट्ट्या घालवल्याचा अंदाज व्यक्त केला. तेव्हापासून ते एकमेकांच्या रिलेशनमध्ये असल्याचं जवळपास सिद्ध झालं. शेरशाह सिनेमात त्या दोघांमध्ये केमिस्ट्री दिसली. त्या जोडीवर प्रेक्षकांनी आणि नेटकऱ्यांनी भरभरून प्रेम करायला सुरुवात केली. तेव्हापासून या दोघांनी खऱ्या आयुष्यातही लग्न करावं अशी अपेक्षा व्यक्त होऊ लागली.

दोघांच्या नात्यामध्ये आला तणाव

मीडिया रिपोर्टनुसार सिद्धार्थ आणि कियारानं २०२१ मध्ये त्याचं नातं पुढं नेण्याचा विचार केला होता. त्या दृष्टीनं ते एकमेकांच्या घरच्यांनाही भेटले होते. कियारानं सिद्धार्थला आणि त्याच्या आईवडिलांना तिच्या घरी जेवणासाठी आमंत्रित केलं. परंतु काही दिवसांनी सिद्धार्थ आणि कियाराच्या नात्यामध्ये तणाव निर्माण झाल्याच्या बातम्या येऊ लागल्या. एक दिवस तर त्याचं ब्रेकअप झाल्याची बातमी आली आणि चर्चेला उधाण आलं. परंतु दोघांमधील प्रेम खरं आणि त्याचं नातं दृढ असल्यानं त्यांच्यात झालेले गैरसमज दूर झाले आणि ते पुन्हा एकत्र आले. रिपोर्टनुसार, कियारानं तिच्या भूलभुलैया २ सिनेमाच्या स्क्रिनिंगसाठी सिद्धार्थला फोन करून आमंत्रित केलं होतं.

दोघांमध्ये आहे केवळ प्रेम

दरम्यान, सिद्धार्थ आणि कियारानं त्यांच्या नात्याबद्दल कधीही सार्वजनिकपणं भाष्य केलेलं नाही. परंतु त्याचं नातं अमान्य देखील केलं नाही. सार्वजनिक कार्यक्रमांमध्ये ते ज्या पद्धतीनं एकमेकांबरोबर सहभागी होतात त्यावरून ते एकमेकांच्या प्रेमात आकंठ बुडाले असल्याचं दिसत होतं. त्यानंतर अनेकदा ते पार्ट्यांमध्येही ते एकत्र दिसले, तसंच सुट्ट्यांवर देखील ते एकत्र जाताना दिसले होते. गेल्या काही दिवसांपासून कियारा आणि सिद्धार्थनं वेगवेगळ्या कार्यक्रमांमध्ये मान्य केलं होतं की त्यांच्या स्पीड डायलमध्ये एकमेकांचा नंबर देखील सेव्ह केलेला आहे. भूलभुलैया २ च्या स्क्रिनिंगच्यावेळेला दोघंजण एकमेकांना प्रेमानं एकत्र जवळ घेताना दिसले होते. तसंच सिद्धार्थ मल्होत्राच्या मिशन मजनू चं कियारानं तिच्या सोशल मीडियावर प्रमोट केलं होतं. त्यावर तिनं सिद्धार्थनं फायरचा इमोजी शेअर करत तो किती हॉट असल्याचं नमूद केलं. आता दोघं लवकरच एकमेकांच्या आयुष्याचे जोडीदार होणार आहेत. अलीकडेच सिद्धार्थच्या वाढदिवशीही कियाराने रोमँटिक फोटो शेअर करत त्याला शुभेच्छा दिलेल्या.