मी बारावी सायन्सची परीक्षा पास झाले आहे. डॉग ट्रेनर म्हणून करिअर कसं करायचं, याबद्दल मला माहिती द्या. मला सीआयडीमध्ये डॉग ट्रेनर म्हणून काम करायचं आहे. पण हे काम कसं सुरू करायचं, याची मला काहीच माहिती नाही. मला योग्य ते मार्गदर्शन करा.
– एक वाचक
उत्तर- कुत्र्यांना कसं प्रशिक्षित करायचं, याचं प्रशिक्षण देणारं नॅशनल ट्रेनिंग सेंटर ग्वाल्हेरमध्ये आहे. पुण्यातील (शिवाजीनगर) पोलिस मुख्यालयातही असं ट्रेनिंग सेंटर आहे. कायदा आणि सुरक्षाविषयक काम करणार्या संस्थांमधील कुत्र्यांना कसं हाताळायचं याचं प्रशिक्षण इथे दिलं जातं. त्याचबरोबर कुत्र्यांना हाताळणाऱ्या व्यत्तींनाही इथे प्रशिक्षित केलं जातं. याशिवाय, पोलिस/सीआयडी यांच्यासाठी वेळोवेळी अशा प्रकारच्या कार्यशाळा घेणारे अनेक डॉग ट्रेनर्स आहेत. भारतात आणि परदेशात असे अनेक डॉग ट्रेनर्स आहेत. अशा प्रकारचे प्रशिक्षण कोर्स ऑनलाइनही उपलब्ध आहेत. तुमच्या पात्रतेप्रमाणे तुम्ही यातील एखादा अभ्यासक्रम पूर्ण करू शकता.
मी ठाण्याच्या व्हीपीएम कॉलेजमधून बीएमएस कोर्स केला आहे आणि एमकॉमचं पहिलं वर्ष पूर्ण केलं आहे. पण मला आता एमबीए, सीए किंवा सीएस व्यतिरित्त इतर कोणतातरी कोर्स करायचा आहे. मी इतर कोणता कोर्स करू शकते?
– अमृता
उत्तर- एमबीए, सीए किंवा सीएस व्यतिरिक्त इतर कोणता कोर्स करायचा झाल्यास तुमच्याकडे आयसीडब्ल्यूए याशिवाय बँकिंग, इन्शुरन्स, म्युच्युअल फंड्स, शेअर्स अँड स्टॉक्स, टॅली पॅकेज, अॅक्च्युरिअल सायन्स क्षेत्राशी संबंधित एखादा कोर्स करण्याचे पर्याय आहेत.
प्लेन बीकॉम केल्यावर करिअरच्या काय संधी आहेत? ग्रॅज्युएशननंतर एखादा कोर्स करायचा झाल्यास बीकॉमनंतर कोणता कोर्स करता येईल?
– शुभम राणे
उत्तर- प्लेन बीकॉम असा कोणताही कोर्स नाही. बीकॉममध्ये अकाउंट्स, ऑडिट आणि कॉस्टिंग आदी विषय शिकवले जातात. फायनान्स क्षेत्रात पुढे जायचं झाल्यास बीकॉमचा हाच पाया महत्त्वाचा ठरतो. बीकॉम पूर्ण केल्यावर सायन्सव्यतिरिक्त टीचिंग, लायब्ररी सायन्स, कम्प्युटर्स, डिझायनिंग, जर्नलिझम, अॅडव्हर्टायझिंग यापैकी एखादा कोर्स करू शकता. याशिवाय, बँकिंग, इन्शुरन्स, म्युच्युअल फंड्स, शेअर्स अँड स्टॉक्स, अॅक्च्युरिअल सायन्स क्षेत्राशी संबंधित एखादा कोर्सही तुम्ही निवडू शकता.