डॉ. बाबासाहेब आंबेडकर तंत्रशास्त्र विद्यापीठ प्रशासनाच्या गलथान कारभारामुळे अभियांत्रिकी अभ्यासक्रमाच्या गुरुवारच्या पेपरला परीक्षा केंद्रांवर धांदल उडाली. विद्यापीठाकडून प्रश्नपत्रिका पाठविण्याऐवजी चक्क प्रश्नपत्रिकेसह आदर्श उत्तरपत्रिका पाठविण्यात आली. पेपरच्या काही मिनिटे आधी प्रकार लक्षात आल्यानंतर परीक्षा केंद्रावर धांदल उडाली. प्रकार लक्षात आणून दिल्यानंतर विद्यापीठाकडून नवीन प्रश्नपत्रिका पाठविण्यात आली. यानंतर पेपर घेण्यात आला.
लोणेरे येथील डॉ. बाबासाहेब आंबेडकर तंत्रशास्त्र विद्यापीठातर्फे अभियांत्रिकी अभ्यासक्रमाच्या प्रथम वर्ष अभ्यासक्रमाच्या विद्यार्थ्यांची प्रथम सत्राची परीक्षा सुरू आहे. सत्र परीक्षांना २० मार्चपासून परीक्षा सुरुवात झाली आहे. गुरुवारी फिजिक्सचा पेपर होता. दुपारी दोन वाजता पेपर सुरू होणार होता.
परीक्षेच्या एक तास आधी विद्यापीठाकडून ऑनलाइन प्रश्नपत्रिका संबंधित परीक्षा केंद्रावर पाठविली जाते. महाविद्यालयाच्या प्राचार्यांना मेलवर प्रश्नपत्रिका पाठविण्यात येते. यानंतर विद्यार्थी संख्येनुसार प्रश्नपत्रिकांच्या छायांकित प्रती काढल्या जातात. यानंतर पेपर घेण्यात येतो. गुरुवारी प्रश्नपत्रिका महाविद्यालयांनी डाऊनलोड केली तेव्हा प्रश्नपत्रिकेसह उत्तरपत्रिकाही सोबत होती. विद्यापीठाकडून उत्तरपत्रिकाही अपलोड करण्यात आल्याचे लक्षात आल्यानंतर राज्यातील संलग्नीत महाविद्यालयांमध्ये धांदल उडाली.
परीक्षा घ्यायची कशी, असा प्रश्न अनेक ठिकाणी उपस्थित करण्यात आला. त्यासह विद्यापीठाला याबाबत कळविण्यात आले. विद्यापीठाकडून चुक सुधारत दुसरी प्रश्नपत्रिका ऑनलाइन पाठविण्यात आली. प्रश्नपत्रिका आल्यानंतर प्रश्नपत्रिका डाऊनलोड करत, छायांकित प्रती काढण्यात आल्या. यानंतर पेपर घेतला गेला अशी माहिती प्राध्यापकांनी दिली.
अनेक केंद्रावर या प्रक्रियेला वेळ लागल्याचे सांगण्यात येते. शहरातील विविध केंद्रावर सहाशेपेक्षा अधिक विद्यार्थी परीक्षार्थी तर मराठवाड्यात एक हजार परीक्षार्थी विद्यार्थी असल्याचे सूत्रांनी सांगितले.
समन्वयाचा अभाव
डॉ. बाबासाहेब आंबेडकर तंत्रशास्त्र विद्यापीठाशी संलग्नीत महाविद्यालय आणि विद्यापीठ यांच्यातील समन्वयाचा अभाव असल्याने परीक्षार्थी विद्यार्थ्यांना गैरसोयींना सामोरे जावे लागते अशा तक्रारी विद्यार्थी, पालकांच्या आहेत. त्यातच असे प्रकार समोर आल्याने प्राध्यापक, विद्यार्थ्यांमध्ये नाराजी आहे. विद्यापीठ उत्तरपत्रिकांचे मूल्यांकन ऑनलाइन पद्धतीने करते. सूत्रांनी दिलेल्या माहितीनुसार पेपर सेटरकडून प्रश्नपत्रिकेसह आदर्श उत्तरपत्रिकाही विद्यापीठाला दिली जाते. तपासणी प्रक्रिये दरम्यान ही उत्तरपत्रिका तपासणी प्रक्रियेत सहभागी प्राध्यापकांना पाठविण्यात येते. परंतु गुरुवारी पेपर सेटर यांच्याकडून आलेल्या प्रश्नपत्रिकेसह उत्तरपत्रिकाही अपलोड करण्यात आल्याचे प्राध्यापकांनी सांगितले. याबाबत विद्यापीठाचे अधिकारी, समन्वयकांशी संपर्क साधण्याचा प्रयत्न केला परंतु संपर्क होऊ शकला नाही.