या दीड हजार संस्थांनी हजारो तरुणांना बेकायदा प्रशिक्षण देत राज्य सरकारचे बोधचिन्ह असलेली प्रमाणपत्रे दिली आहेत. हा प्रकार उघडकीस आल्यानंतर महाराष्ट्र राज्य कौशल्य, व्यवसाय शिक्षण व प्रशिक्षण मंडळांच्या तक्रारीवरून बोरिवलीच्या ‘एज्युकेशनल बोर्ड ऑफ व्होकेशनल ट्रेनिंग अँड रिसर्च’ या संस्थेच्या पदाधिकाऱ्यांविरुद्ध गुन्हा दाखल करण्यात आला आहे.
बोरिवली पूर्वेकडील ‘एज्युकेशनल बोर्ड ऑफ व्होकेशनल टेनिंग ॲन्ड रिसर्च’ या संस्थेने धर्मादाय आयुक्त कार्यालयात नोंदणी केली आहे. ही खासगी संस्था इतर छोट्या संस्थांकडून पैसे घेऊन त्यांना शासकीय अभ्यासक्रम राबविण्यास मान्यता देत असल्याची माहिती कौशल्य, व्यवसाय शिक्षण व प्रशिक्षण मंडळाला एका तक्रारीद्वारे नोव्हेंबर २०२१ मध्ये मिळाली. तसेच उमेदवारांना प्रशिक्षण घेतल्याचे प्रमाणपत्र दिले जात असल्याचेही समजते.
मंडळाच्या वतीने शहानिशा केली असता संस्थेचे www.ebitr.com या नावाचे संकेतस्थळ असून, त्यावर १,५१४ संस्थांना मान्यता देण्यात आली असल्याची यादी दिसून आली. तसेच संकेतस्थळावर ‘सरकार मान्यताप्राप्त’ असे लोगोही वापरत असल्याचे आढळून आले. खासगी संस्थांची व बेरोजगार उमेदवारांची फसवणूक करीत असल्याने संस्थेच्या पदाधिकाऱ्यांना सुनावणीसाठी बोलावण्यात आले. सुरुवातीला त्यांनी टाळाटाळ केली. मात्र, नंतर मंडळाच्या कार्यालयात पदाधिकारी आले. त्यांनी उपयुक्त माहिती न दिल्याने मंडळाकडून त्यांच्या बोरिवली येथील कार्यालयात छापा टाकण्यात आला.
या वेळीही मंडळाची किंवा सरकारची मान्यता असल्याची कोणतेच दस्तावेज त्यांना सादर करता आले नाहीत. राज्यात कृषी, पशू व मस्त्य विज्ञान, आरोग्य विज्ञान, उच्च तंत्र व व्यवसाय शिक्षण यामधील अनधिकृत संस्था सुरू करून विनापरवानगी अभ्यासक्रम, प्रशिक्षण देऊन सरकारची, खासगी संस्था आणि बेरोजगारांची फसवणूक केल्याप्रकरणी ‘एज्युकेशनल बोर्ड ऑफ व्होकेशनल टेनिंग ॲन्ड रिसर्च’ या संस्थेविरुद्ध शासकीय मंडळाच्या सचिवाने कस्तुरबा मार्ग पोलिस ठाण्यात तक्रार केली.
असे चालते कामकाज
महाराष्ट्र सरकारच्या कौशल्य विकास रोजगार, उद्योजकता व नाविन्यता विभागाच्या अधिपत्याखाली महाराष्ट्र राज्य कौशल्य, व्यवसाय शिक्षण व प्रशिक्षण मंडळ हे कार्यरत आहे. उद्योग क्षेत्रातील विविध कामांसाठी कुशल मनुष्यबळाचा पुरवठा करणे व त्यासाठी युवकांना रोजगाराभिमुख प्रशिक्षण देऊन सक्षम बनविणे; तसेच कौशल्ययुक्त प्रशिक्षण देऊन उद्योग व उत्पादन वाढविणे या उद्दिष्टांसाठी अभ्यासक्रम तयार करण्याचे काम मंडळामार्फत केले जाते. खासगी संस्था आणि अभ्यासक्रम मान्यता, संलग्नता व परीक्षा प्रक्रियेची परवानगी सरकार मान्यतेने महामंडळातर्फे दिली जाते.