‘जाहीरात क्षेत्र’चा करिअरच्या दृष्टीने विचार करताय; मग हे नक्की वाचा

Career Opportunities in Advertising Sector: आजचे युग स्पर्धेचे आहे. यात वावरताना प्रत्येक गोष्टीची, वस्तूची प्रसिद्धी करणे आवश्यक झाले आहे. अशावेळी कामी येते ती जाहिरात! जाहिरात आणि प्रसिद्धीला आज प्रचंड महत्त्व आले आहे. कोणतीही सेवा किंवा उत्पादन विकताना उत्पादकांना/निर्मात्यांना त्याची प्रभावी जाहिरात करणे गरजेचे वाटू लागले आहे. यातूनच अनेक कल्पक उमेदवारांना करिअरसाठी जाहिरातीचे जग खुणावू लागले आहे.

जाहिरात क्षेत्रात काम करणे, फायद्याचे असले तरी ते तेवढेच आव्हानात्मकसुद्धा आहे. कारण इथे वस्तू, सेवा किंवा उत्पादनांचे प्रभावी ‘फर्स्ट इम्प्रेशन’ निर्माण करण्यासाठी दुसरी संधी मिळत नाही. पहिल्याच खेपेत जाहिरातदारांना हे आव्हान यशस्वीपणे पार पाडायचे असते. ग्राहकांना आवश्यक (काही वेळेस अनावश्यकसुद्धा) खरेदी करण्यास भाग पाडण्याचे काम ‘जाहिरात’ करते. तिच्या माध्यमातून ग्राहकांवर संबंधित उत्पादनाचा प्रभाव पाडला जातो. इथे क्रिएटिव्ह काम करावे लागते, तसेच अ‍ॅडमिनिस्ट्रेटिव्ह आणि एक्झिक्युटिव्ह डिपार्टमेंट्समध्येही काम करावे लागते. जाहिरात क्षेत्रात काम करू इच्छिणाऱ्यांनी ही गोष्ट ध्यानात घ्यायला हवी.

जाहिरात हे संवादाचे प्रभावी माध्यम आहे. कोणतेही उत्पादन वा सेवा ग्राहकांपर्यंत पोहोचवण्याचे मुख्य आणि प्राथमिक काम यामार्फत होत असते. इतरांपेक्षा आपले उत्पादन आणि सेवा कशी चांगली आहे, हे जाहिरातीच्या माध्यमातून सांगितले जाते. पोस्टर्स, बॅनर्स, होर्डिंग्ज, साइनबोर्डस् तसेच वर्तमानपत्रे, मासिके, टीव्ही, रेडिओ आणि इंटरनेटवरील जाहिराती आदी प्रकारांचा यात समावेश होतो.

ग्राहकांना प्रभावित करण्यासाठी, त्यांना आकर्षित करून घेण्यासाठी विविध उत्पादने आणि सेवा पुरवणाऱ्या कंपन्या जाहिरातींचा आधार घेतात. एवढेच नाही, तर राजकीय संस्था, नेते, सामाजिक संस्था नागरिकांचे मत अनुकूल बनवण्यासाठी याच माध्यमाचा आधार घेतात.

जाहिरात हे सेवा क्षेत्र प्रकारात गणले जाते. त्यामुळे प्रत्येक जाहिरात एजन्सी/कंपनीची प्रतिमा ही त्यांनी वेळोवेळी बनवलेल्या प्रभावशाली जाहिरातींवरून तयार होत असते. कल्पकतेची कसोटी पाहणाऱ्या या क्षेत्रात काम करणे प्रचंड आव्हानात्मक आहे.

काय आहेत नोकरीच्या संधी ?

जाहिरातीत स्पेशलायझेशन केलेल्या पदवीधर आणि पदव्युत्तर पदवीधारकांना जाहिरात कंपन्या, मनोरंजन क्षेत्रातील प्रॉडक्शन हाऊसेस, कॉर्पोरेट अँड डिपार्टमेंट्स आदी ठिकाणी काम करण्याची संधी मिळू शकते. या ठिकाणी क्रिएटिव्ह तसेच एक्झिक्युटिव्ह स्तरावर काम करण्याच्या खूप संधी असतात. यात मीडिया प्लॅनिंग, मार्केट रिसर्च, डायरेक्ट मार्केटिंग, क्लाएण्ट सर्व्हिसिंग, कॉपीरायटिंग, डिजिटल मार्केटिंग अँड प्रमोशन, ब्रँड मॅनेजमेंट, ब्रँड डेव्हलपमेंट, इव्हेंट मॅनेजमेंट, प्रिंट, ब्रॉडकास्ट, इलेक्ट्रॉनिक्स आणि डिजिटल मीडिया आदी क्षेत्रांत काम करावे लागते.

जाहिरात क्षेत्रात प्रवेश करताना…

जाहिरात क्षेत्रात काम करायचे तर या क्षेत्राचे औपचारिक प्रशिक्षण घ्यायला हवे. यासाठी विविध संस्थांमध्ये उपलब्ध असणाऱ्या अभ्यासक्रमांपैकी एखादा निवडता येईल. अंडर ग्रॅज्युएट डिप्लोमा, ग्रॅज्युएशन, पोस्ट ग्रॅज्युएट प्रोग्रॅम, पोस्ट ग्रॅज्युएट डिप्लोमा प्रोग्रॅम आदी अनेक कोर्सेस स्वायत्त (ऑटोनॉमस) आणि डीम्ड् युनिव्हर्सिटीजमध्ये उपलब्ध आहेत.

यशस्वी होण्यासाठी…

• कल्पकता आणि या क्षेत्राचे ज्ञान
• लेखन, चौकटीबाहेर विचार करण्याची क्षमता, दूरदृष्टी, व्हिज्युअलायझेशन स्किल्स
• डेडलाइन (मुदत) आणि दबावाखाली (प्रेशर) काम करण्याचीही तयारी
• कठोर मेहनतीची तयारी
• तासंतास सतत काम करण्याची तयारी