सारस बाग येथील महालक्ष्मीच्या मंदिराची स्थापना बन्सीलाल रामनाथ अग्रवाल यांनी १९८१ साली केली. आदि पराशक्तीची तीन रुपे संपूर्ण विश्वाची उत्पत्ती, स्थिती आणि लय यांच्या अधिष्ठात्री देवता या मंदिरात विराजमान आहेत. श्री महालक्ष्मी मंदिर हे एक वैशिष्ट्यपूर्ण मंदिर आहे. इथे आदि पराशक्तीच्या तीनही रुपांचे तथा आदिमातांचे दर्शन होते. विद्येची देवता असलेली श्री महासरस्वती, समृद्धीची देवता असलेली श्री महालक्ष्मी आणि सत्य व अस्तित्व यांचा आधार असलेल्या चैतन्याची देवता श्री महाकाली.
महालक्ष्मी मंदिराचे शिखर ५५ फूट उंच, २४ फूट रुंद असून मंदिराचे छत ५४ फूट लांब आहे. मंदिराचे प्रवेशद्वार, त्यातील खांब आणि अंतर्भागातील भिंतींवर नाजुक कोरीवकाम केले आहे. महालक्ष्मी, महासरस्वती आणि महाकाली यांच्या मूर्ती सहा फूट उंच असून, संगमरवरातून घडविलेल्या आहेत. अलिकडच्या काही वर्षांत त्या सोन्याने सुशोभित केल्या आहेत. कालीची मूर्ती काळ्या पाषाणात घडविली आहे. मंदिरातील मूर्तींची प्राणप्रतिष्ठापना आणि मंदिराचे लोकार्पण १५ फेब्रुवारी १९८४ रोजी तीर्थस्वरूप स्वामी श्री. घनश्यामजी आचार्य यांच्या हस्ते करण्यात आले होते.
मंदिराभोवती प्रदक्षिणा मार्गात भिंतीवर अनुक्रमे संत दानेश्वर, संत तुकाराम, संत तुलसीदास, संत जलाराम, संत चैतन्य महाप्रभू, संत कबीरदास, संत सूरदास, श्री रामदास स्वामी,संत गुरु नानक, संत रामकृष्ण परमहंस, संत बसवेश्वर, आणि मीराबाई या बारा संतांची चित्रे कोरलेली आहेत. जेणेकरून भक्तांना मातेचे आशीर्वाद मिळावेत तसेच या महान गुरूंनी दिलेल्या शिकवणुकीचे ज्ञान मिळावे.
नवरात्रोत्सवादरम्यान मंदिरातर्फे अनेक धार्मिक, सामाजिक आणि सांस्कृतिक उपक्रम राबविले जातात. येथे गेल्या २० वर्षांपासून श्रीसूक्त, अथर्वशीर्ष पठणाचे कार्यक्रम आयोजित केले जातात. यांमध्ये सुमारे १५,००० शालेय विद्यार्थी पठणासाठी एकत्र येतात. कन्यापूजेच्या वेळी मंदिरातर्फे शालेय विद्यार्थिनींना शालेय साहित्य आणि प्रसादाचे वाटप केले जाते. नवरात्रीनिमीत्त देवींचे दर्शन घ्या आणि शक्य असल्यास या मंदिराला एकदा आवर्जुन भेट द्या.