खेळ बाद, पण पुरस्कार मिळणार; शिवछत्रपती पुरस्कारराबाबत राज्य सरकारचा अजब नियम

म. टा. प्रतिनिधी, पुणे : शिवछत्रपती क्रीडा पुरस्काराच्या यादीतून अश्वारोहण हा खेळ वगळण्यात आला आहे. मात्र, या खेळात आशियाई क्रीडा स्पर्धेतील सुवर्णपदक विजेत्या भारतीय संघातील अश्वारोहक हृदय छेडा याला पुरस्कार मिळणार असल्याचे राज्याच्या क्रीडा आयुक्तांनी स्पष्ट केले. त्यामुळे खेळ बाद, पण त्यातील पदक विजेत्या खेळाडूस थेट पुरस्कार देण्याचा अजब नियम राज्य सरकारने केला आहे.

शिवछत्रपती क्रीडा पुरस्कार आणि कोणता ना कोणता वाद आता जणू समीकरणच झाले आहे. राज्य सरकारने नुकतीच राज्यातील क्रीडा क्षेत्रातील सर्वोच्च मानल्या जाणाऱ्या शिवछत्रपती क्रीडा पुरस्कारांसाठी नियमावली जाहीर केली. आता पुरस्कारांच्या यादीतून अश्वारोहण, गोल्फ, कॅरमसह सहा खेळांना वगळण्यात आले आहेत. अश्वारोहण, गोल्फ आणि यॉटिंग वगळण्यामागे पायाभूत सुविधांचा अभाव आणि तालुका तसेच जिल्हास्तरावरील स्पर्धांचे आयोजन नाही; तसेच या खेळांचा राज्यात प्रचार आणि प्रसार नाही, असे कारण देण्यात आले. तर, कॅरम, पॉवरलिफ्टिंग, शरीरसौष्ठव, बिलियर्ड्स आणि स्नूकर या खेळांना वगळण्यामागे ऑलिम्पिक, आशियाई क्रीडा स्पर्धा राष्ट्रकुल क्रीडा स्पर्धांत समावेश नसल्याचे कारण देण्यात आले आहे.

‘अश्वारोहण, गोल्फ, यॉटिंग हे खेळ वगळण्यामागील कारणे गमतीशीर आहेत. सरकारने पुरस्कारासाठी पात्र ठरवलेल्या यादीत असे अनेक खेळ आहेत; ज्यांच्या तालुका आणि जिल्हास्तरावरील स्पर्धा पाहायला मिळत नाहीत; मग हे खेळ कसे आले? आट्यापाट्या हा खेळ किती ठिकाणी पाहायला मिळतो? मॉडर्न पेंटथलॉन हा ऑलिम्पिक खेळ आहे. मात्र, आपल्याकडे हा खेळ आणि त्याच्या सर्व प्रकारांचा समावेश असलेल्या स्पर्धा होतात का, याकडेही सरकारने लक्ष द्यायला हवे,’ असे मत एका क्रीडा संघटकाने व्यक्त केले.

अश्वारोहण खेळ वगळला आहे. मात्र, गेल्याच वर्षी झालेल्या आशियाई क्रीडा स्पर्धेत भारताने सुवर्णपदक जिंकले होते. या विजेत्या संघात महाराष्ट्राच्या खेळाडूचा समावेश आहे. अर्थात, तो थेट पुरस्कारासाठी पात्र ठरत आहे. मात्र, आता हा खेळच पुरस्कार दिल्या जाणाऱ्या खेळांच्या यादीतून वगळल्याने संभ्रम निर्माण झाला. गेल्या वर्षी झालेल्या आशियाई क्रीडा स्पर्धेत भारताने सुवर्णपदक जिंकले होते. या विजेत्या संघात मुंबईच्या हृदय छेडाचा समावेश होता. मात्र तो पुरस्कारासाठी पात्र आहे, अशी ग्वाही राज्याच्या क्रीडा आयुक्तांनी ‘मटा’ला दिली आहे.

‘खेळ वगळू नये’

‘केंद्र सरकार अश्वारोहकांना अर्जुन पुरस्काराने गौरवत आहे. या वेळच्या केंद्राच्या क्रीडा पुरस्कार यादीतही अश्वारोहक आहे. देशभरात सर्वत्र अश्वारोहणाच्या सुविधा नाहीत, तरीही हा पुरस्कार दिला आहे. त्यामुळे राज्यानेही हा खेळ पुरस्कारांमधून वगळू नये,’ असे मत ‘अॅमेच्युअर्स रायडर्स क्लब’चे श्याम मेहता यांनी व्यक्त केले.

अश्वारोहण खेळ वगळला असला, तरी संबंधित खेळातील खेळाडूने आशियाई क्रीडा स्पर्धेत सुवर्णपदक मिळवल्यास, त्याला थेट पुरस्कार दिला जाणार आहे.- सुहास दिवसे, राज्याचे क्रीडा आयुक्त