हिवाळा हा स्ट्रॉबेरीचा मुख्य हंगाम. त्यानुसार बाजारात दिवाळीनंतर स्ट्रॉबेरीची आवक होण्यास सुरुवात होते. मात्र यावर्षी शेतात स्ट्रॉबेरीचे पीक येण्यास सुरुवात झाली आणि त्याच वेळी अवकाळी पाऊस आला. त्यामुळे रोपे जमिनीवरच आडवी झाल्याने शेतकऱ्यांचे मोठे नुकसान झाले. परिणामी, शेताची साफसफाई करून पुन्हा नव्याने स्ट्रॉबेरीची लागवड करावी लागली. त्यामुळे यावर्षी स्ट्रॉबेरीचा हंगाम काहीसा उशिराने सुरू झाला. त्यानुसार आता स्ट्रॉबेरीची आवक बाजारात वाढू लागली आहे.
आत्तापर्यंत स्ट्रॉबेरीची लागवड महाबळेश्वर, पाचगणी या भागात होत होती. मात्र, मागील दोन-तीन वर्षांपासून नाशिकमध्येही स्ट्रॉबेरीची लागवड केली जात आहे. त्यामुळे महाबळेश्वर पाठोपाठ नाशिकची स्ट्रॉबेरीही बाजारात सध्या दिसत आहे. बाजारात स्ट्रॉबेरीच्या विंटर डाऊन, मिलिसा, एमटू, एसवन, आरवन या जातींची फळे येत आहेत. या सर्व स्ट्रॉबेरी चवीला गोड असून दिसायलाही मोठ्या आणि देखण्या आहेत. घाऊक बाजारात सध्या या स्ट्रॉबेरीने सर्वांचे लक्ष वेधून घेतले आहे.
बाजार सकाळीच
स्ट्रॉबेरी हे नाजूक फळ असल्याने घाऊक बाजारात तिची आवक अगदी पहाटेच होते. सकाळी ११ वाजेपर्यंत बाजार आटोपतो. कारण उन्हे कडक झाल्यावर स्ट्रॉबेरी खराब होऊ लागते. आवक चांगली असल्याने स्ट्रॉबेरीच्या ४०० ते ५०० ग्रॅमच्या खोक्याची किंमत ५० रुपयांपासून ते १२० रुपयांपर्यंत आहे.
सध्या स्ट्रॉबेरीचा हंगाम तेजीत आहे. दोन्ही ठिकाणांहून स्ट्रॉबेरी बाजारात येत असल्याने आवक चांगली आहे. सध्या चांगले वातावरण असल्याने, चांगली स्ट्रॉबेरी बाजारात दिसत आहे. फेब्रुवारीपर्यंत हा हंगाम सुरू राहणार आहे. – विजय ढोले, स्ट्रॉबेरीचे घाऊक व्यापारी