राज्यातील सर्व जिल्ह्यांमधील करोना तपासणीचा अहवाल पॉझिटिव्ह आलेल्या रुग्णांच्या नमुन्यांचे जीनोम सिक्वेन्सिंग शहरात बी. जे. वैद्यकीय महाविद्यालयात करण्यात येत आहे. या तपासणीसाठी आतापर्यंत आलेल्या नमुन्यांपैकी ९० टक्के नमुने पुणे जिल्ह्यातील होते, तर उर्वरित १० टक्के नमुने राज्यातील विविध जिल्ह्यांमधून आले होते.
पुणे जिल्ह्यातून आलेल्या नमुन्यांपैकी ८८ टक्के रुग्णांना ‘जेएन १’ या विषाणूचा संसर्ग झाल्याचे आढळले. १६ ते ३० या वयोगटातील नागरिकांना ‘जेएन १’ विषाणूचा संसर्ग होण्याचे प्रमाण जास्त आहे. संसर्ग होण्याचे प्रमाण जास्त असले, तरी बहुतांश रुग्णांना सौम्य लक्षणे आहेत. यामुळे रुग्णालयात दाखल होण्याचे प्रमाण कमी असल्याचे निरीक्षण बी. जे. वैद्यकीय महाविद्यालयाच्या सूक्ष्मजीवशास्त्र विभागातील डॉक्टरांनी नोंदवले.
राज्य करोना टास्क फोर्सचे अध्यक्ष डॉ. रमण गंगाखेडकर म्हणाले, ‘डिसेंबरमध्ये नाताळ; तसेच नवीन वर्षानिमित्त पर्यटनासाठी अनेकांनी प्रवास केला. प्रवास केलेल्या नागरिकांच्या माध्यमातून संसर्ग वाढण्याची शक्यता आहे. ‘जेएन १’चा संसर्ग रोखण्यासाठी पुढील पंधरा दिवस महत्त्वाचे आहेत.’
टास्क फोर्सने केलेल्या सूचना
– लक्षणे असलेल्या रुग्णांनी तपासणी करावी.
– रुग्णालयात दाखल करण्याची गरज नसल्यास पाच दिवस गृहविलगीकरणात राहावे.
– घरामध्ये हवा खेळती ठेवावी.
– लक्षणे असलेल्या रुग्णांनी मास्कचा वापर करावा.
– सहव्याधी असलेल्या रुग्णांच्या संपर्कात येऊ नये.
– सहव्याधी असलेल्यांमध्ये लक्षणे दिसल्यास डॉक्टरांचा सल्ला घेऊन रुग्णालयात दाखल व्हावे.
राज्यात गेल्या वर्षीपर्यंत करोनाच्या ‘एक्सबीबी’ या विषाणूचे रुग्ण आढळत होते. मात्र, सद्यस्थितीत ‘जीनोम सिक्वेन्सिंग’मध्ये ‘जेएन १’ या विषाणूचे रुग्ण आढळत आहेत. या विषाणूचा संसर्ग होण्याचे प्रमाण जास्त आहे. मात्र, बहुतांश रुग्णांमध्ये सौम्य लक्षणे आढळत आहेत.- डॉ. राजेश कार्यकर्ते, राज्य समन्वयक, जीनोम सिक्वेन्सिंग