विमा कंपनीत काम करणारे संजय (तक्रारदाराचे नाव बदलले आहे) ठाण्यातील माजिवाडा परिसरात राहतात. त्यांना अमित कुमार नामक व्यक्तीचा फोन आला. त्याने बँकेचा अधिकारी असल्याचे भासवत तुमचे बँक खाते बंद होणार असल्याचे सांगत संजय यांच्याकडे जन्मतारखेची विचारणा केली. पत्नीच्या बँक खात्याचे शेवटचे चार क्रमांक आणि पॅन कार्ड नंबरही अमितने सांगितल्याने संजय यांचा त्याच्या बोलण्यावर विश्वास बसला. मग त्यांनी त्याला जन्मतारीख आणि इतरही माहिती दिली. नंतर संजय यांच्या ईमेल आयडीवर ओटीपी नंबर आला.
मात्र, त्यांच्या मोबाइलला रेंज नसल्याने अमितने व्हॉट्सअॅपवरून व्हिडिओ कॉल करत त्यांना बँकेचा लोगो पाठवला. यावर त्यांनी क्लिक केले. तसेच, स्क्रीन शेअरच्य़ा पर्यावरही क्लिक करत मोबाइलवर आलेला ओटीपी नंबर संजय यांनी अमितला दिला. नंतर पत्नीच्या बँक खात्यामधून पैसे काढल्याचा आणि चार लाख ६१ हजार रुपयांचे कर्ज घेतल्याचा संजय यांना मेसेज आला. तसेच, बँक खात्यामधून पाच लाख ६४ हजार, ४५ हजार रुपये परस्पर कोणीतरी काढल्याने संजय यांच्या पायाखालची वाळूच सरकली. सायबर गुन्हेगारांनी ४० मिनिटांमध्ये ७ लाख ७ हजार २०० रुपये बँक खात्यामधून काढून संजय आणि त्यांच्या पत्नीची फसवणूक केली आहे. या प्रकरणी त्यांनी दिलेल्या तक्रारीनंतर गुन्हा दाखल झाला.