दोन तस्कर येणार; पोलिसांना गुप्त माहिती, सापळा रचून दोघांना अटक, कारमध्ये जे सापडलं ते पाहून…

ठाणे: डोंबिलीतील मानपाडा परिसरातून गुन्हे शाखेच्या युनिट ३ ने (कल्याण) दोघांना अटक करत त्यांच्याकडून पटेरी वाघ सदृश्य या वन्यजीव प्राण्याचे कातडे, एक पिस्तूल आणि दोन जिवंत काडतुसे जप्त केली. या प्रकरणी आरोपींविरुद्ध मानपाडा पोलीस ठाण्यात गुन्हा दाखल झाला आहे.
इडलीवरही अवतरले राम; इडली विक्रेत्याची अनोखी संकल्पना, नागरिकांकडून उपक्रमाचे स्वागत
मिळालेल्या माहितीनुसार, सिताराम नेरपगार (५१), ब्रिजलाल साईसिंग पावरा (२२) अशी या आरोपींची नावे आहेत. आरोपी जळगाव आणि धुळ्याचे रहिवाशी असल्याची माहिती पोलिसांनी दिली. डोंबिवलीमध्ये पटेरी वाघाचे कातडे, पिस्तूल आणि काडतुसे विक्रीसाठी दोन तस्कर येणार असल्याची माहिती युनिट ३ चे पोलीस हवालदार दत्ताराम भोसले यांना मिळाली होती. या माहितीनंतर गुन्हे शाखेच्या पथकाने कल्याण-शिळफाटा रस्त्यावरील एका हॉटेलच्या (मानपाडा) पार्किंगमध्ये सापळा लावत कारमधून सिताराम आणि ब्रिजलाल यांना ताब्यात घेतले.

त्यांच्या ताब्यातून पटेरी वाघ सदृश्य वन्यजीव प्राण्याचे कातडे, एक देशी बनावटीचे पिस्तूल, दोन जिवंत काडतुस, मोबाइल जप्त केले. आरोपी कातडे आणि पिस्तूल कोणाला विक्री करण्यासाठी आले होते याचा तपास पोलीस करत आहे. ही कामगिरी युनिट ३ चे वरिष्ठ पोलीस निरीक्षक नरेश पवार, सहायक पोलीस निरीक्षक संदीप चव्हाण, पोलीस हवालदार दत्ताराम भोसले, बालाजी शिंदे यांनी केली.