पाचशे वर्षांनंतर रामलला भव्य मंदिरात जाणार आहेत. रामभक्तांचे बहुप्रतीक्षित असे हे स्वप्न साकार होत आहे. या पार्श्वभूमीवर प्रत्येक मोहल्ल्यात धार्मिक उपक्रम राबविण्यात येणार आहेत. यासंदर्भात विश्व हिंदू परिषद, भारतीय जनता पार्टी, रा. स्व. संघाने धंतोली येथील विश्व हिंदू परिषदेच्या कार्यालयात शुक्रवारी संयुक्त पत्रपरिषद घेतली. यावेळी विश्व हिंदू परिषदेचे क्षेत्रमंत्री (महाराष्ट्र, गोवा) गोविंद शेंडे, विदर्भ प्रांत मंत्री प्रशांत तितरे, श्रीराम जन्मभूमी प्राणप्रतिष्ठा उत्सव समितीचे नागपूर महानगरचे संयोजक अमोल ठाकरे, सहसंयोजक गौरव जाजू, सहसंयोजक भावना भगत, प्रचार-प्रसारप्रमुख चंदन गोस्वामी यांची उपस्थिती होती.
नागपूर महानगराच्या अनुषंगाने माहिती देताना अमोल ठाकरे म्हणाले, ‘२७ नोव्हेंबरपासून राम मंदिर प्राणप्रतिष्ठा सोहळ्याच्या निमित्ताने अभियान सुरू झाले. त्याअंतर्गत संपूर्ण प्रांतात ३४ ठिकाणी तर नागपूर महानगरात १२ ठिकाणी अक्षता कलश वितरित करण्यात आले. त्यानुसार, शहरात ४५० छोट्या-मोठ्या कलशयात्रा निघाल्या. त्यातील सर्वात मोठी कलशयात्रा उत्तर नागपुरातील वनदेवीनगरातील होती. त्यात १० हजार भाविक सहभागी झाले होते. १ ते १५ जानेवारीदरम्यान शहरात ५ लाख ३२ हजार घरांपर्यंत संपर्क साधून प्राणप्रतिष्ठा सोहळ्याच्या निमंत्रण अक्षता देण्यात आल्या.’ अयोध्येतील सोहळ्यासाठी विदर्भातून ३६५ संत आणि विशेष आमंत्रित राहणार आहेत.
मुस्लिम, ख्रिश्चन, शीख, दलित समुदायाचा सहभाग
अक्षता वाटपदरम्यान खलाशी लाइन टाकळी, मोहननगर या भागांतील ख्रिश्चन समुदायानेदेखील प्राणप्रतिष्ठा सोहळ्याच्या अक्षता स्वीकारल्या. ‘आमचे पूर्वजदेखील हिंदू होते’, असे म्हणत अक्षता स्वीकारताना एका ख्रिश्चन महिलेच्या डोळ्यांत अश्रू तरळले होते. टेकानाका परिसरातील मुस्लिम समुदायाने दीपोत्सवासाठी तेल, दिवे आणि वाती देत या कार्यात सहभाग नोंदिवला आहे. उत्तर नागपुरातील गुरुद्वारा येथे १३ हजार दिवे प्रज्वलित करण्यात येणार आहेत. पूर्व नागपूरातील बौद्धवस्तीतही २२ जानेवारीला कार्यक्रम होणार आहे.
६० बाइक रॅली, एकाच वेळी महाआरती
प्राणप्रतिष्ठा सोहळ्याच्या पूर्वसंध्येला अर्थात २१ जानेवारीला शहरातील विविध भागातून सुमारे ६० बाइक रॅली निघणार आहेत. तर २२ला सकाळी १० रामधून रॅली होतील. दुपारी १२.३८ वाजता अयोध्येत आरती होईल, त्याचवेळी सर्वत्र महाआरती होणार आहे. यामध्ये कारसेवकाला प्रथम आरती करण्याचा मान देण्यात येणार आहे.
संघाच्या ३६२ वस्त्यांमध्ये ९१४ उपक्रम
संघाच्या नागपूर महानगरातील ३६२ वस्त्यांमध्ये कार्यक्रमाचे आयोजन करण्यात आले आहे. याअंतर्गत प्रत्येक वस्तीसाठी एक वस्तीप्रमुख नियुक्त करण्यात आला आहे. त्यांच्या मार्गदर्शनात प्रत्येक वस्तीत ३ ते ४ याप्रमाणे ९१४ उपक्रम होतील, अशी माहिती गौरव जाजू यांनी दिली.