अभिनेता भूषण पाटील यानं या सिनेमात मुख्य भूमिका म्हणजेच छत्रपती संभाजी महाराज यांची भूमिका साकारली आहे. अनेक अभिनेत्यांनी या भूमिकेसाठी ऑडिशन दिली होती. पण या भूमिकेसाठी माझी निवड झाली, हे माझं सौभाग्यच आहे, असं तो म्हणतो. या भूमिकेसाठी शारीरिक आणि मानसिक अशी दुहेरी कसरत केल्याचंही त्यानं म्हटलंय.
सिनेमाच्या कमाईबद्दल बोलायचं झालं तर, sacnilk या वेब साइटवरच्या आकड्यांनुसार प्रदर्शित झाल्यानंतर पहिल्या दिवशी सिनेमानं ०.६ कोटींची कमाई केली तर दुसऱ्या दिवशी सिनेमानं ०.९ कोटींचा गल्ला जमवला होता. तर तिसऱ्या दिवशी रविवार असल्यानं या सिनेमानं एक कोटीच्यावर कमाई केली. तर चौथ्या दिवशी सिनेमानं ०.६४ कोटींची कमाई केली आहे. तर सिनेमाची एकूण कमाई ही तीन ते साडेतीन कोटींच्या जवळपास आहे. हे आकडे येत्या आठवड्यात वाढतील असं म्हटलं जात आहे.
चित्रपटात महाराणी येसूबाई यांची भूमिका अभिनेत्री तृप्ती तोरडमल हिनं साकारली आहे , तर कवी कलश यांची व्यक्तिरेखा विक्रम गायकवाड यांनी साकारली आहे. बिपीन सुर्वे हा औरंगजेबाच्या छावणीतील गुप्तहेराच्या भूमिकेत आहे. सिनेमात बहिर्जी नाईक यांची व्यक्तिरेखा ही रवी काळे यांनी साकारली आहे. चित्रपटात औरंगजेब यांची भूमिका साकारली आहे समीर धर्माधिकारी यांनी.
‘शिवरायांचा छावा’ हा चित्रपट १६ फेब्रुवारी २०२४ ला प्रेक्षकांच्या भेटीस आला आहे. मल्हार पिक्चर्स कंपनीचे वैभव भोर, किशोर पाटकर, मधू यांनी या ऐतिहासिक चित्रपटाची निर्मिती केली आहे. सह-निर्मिती भावेश रजनीकांत पंचमतीया यांनी केली आहे.