ब्लिंकन यांचा तीन दिवसांचा चीन दौरा संपल्यानंतर ते अमेरिकेत परतले आहेत. या दौऱ्यामध्ये त्यांनी चीनचे अध्यक्ष शी जिनपिंग यांच्यासह चीनच्या वरिष्ठ अधिकाऱ्यांच्या भेटी घेतल्या. रशियाच्या संरक्षण औद्योगिक केंद्रासाठी चीनकडून होणाऱ्या पुरवठ्याची मदत होत आहे, असा अमेरिकेचा आरोप आहे; तसेच अमेरिकेने चीनच्या १००पेक्षा जास्त कंपन्यांवर निर्बंध लादले आहेत. त्यामुळे युक्रेन युद्धामध्ये रशियाला मदत करू नये, यासाठी ब्लिंकन यांनी चीनकडे पाठपुरावा केला. यापुढेही चिनी कंपन्यांवर कारवाई करण्यात येईल, असे ब्लिंकन यांनी एका वृत्तवाहिनीला दिलेल्या मुलाखतीमध्ये म्हटले आहे.
अध्यक्षपदाच्या निवडणुकीत चीन प्रभाव टाकण्याचा प्रयत्न करीत आहे. या निवडणुकीत हस्तक्षेप करणार नाही, अशी हमी जिनपिंग यांनी दिली होती. याविषयी, अध्यक्ष जो बायडेन यांनी नोव्हेंबरमध्ये जिनपिंग यांना निवडणुकीत हस्तक्षेप न करण्याविषयी सांगितले होते. मात्र, त्यांचा हस्तक्षेप सुरूच होता, असेही त्यांनी नमूद केले.
चिनी पाणबुडीचे जलावतरण
इस्लामाबाद : पाकिस्तानला मदत करण्यासाठी चीनकडून हंगोर श्रेणीच्या आठ पाणबुड्यांची निर्मिती करण्यात येत आहे. यातील पहिल्या पाणबुडीचे जलावतरण करण्यात आले. श्वांगलिऊ तळावर या नौकेचे जलावतरण करण्यात आले. या वेळी पाकिस्तानच्या नौदलाचे प्रमुख नावीद अश्रफ उपस्थित होते. या करारानुसार, चार पाणबुड्या चीनमध्ये बांधण्यात येणार असून, उर्वरित पाणबुड्या कराचीमध्ये बांधण्यात येणार आहेत.