जेफ बेझोस यांच्या ‘ब्ल्यू ओरिजिन’ कंपनीच्या एनएस-२५ मोहिमेमध्ये या अंतराळवीरांचे उड्डाण होणार आहे. या मोहिमेची तारीख अद्याप निश्चित करण्यात आलेली नाही. या मोहिमेसाठी निवडण्यात आलेल्या सहा अंतराळवीरांमध्ये थोटाकुरा यांचा समावेश आहे. या मोहिमेनंतर राकेश शर्मा यांच्यानंतर थोटाकुरा हे दुसरे भारतीय अंतराळवीर ठरणार आहे. ‘ब्ल्यू ओरिजिन’ने फेरवापरासाठी विकसित केलेल्या ‘न्यू शेफर्ड’ या यानातून अंतराळवीरांसह होणारे हे सातवे उड्डाण असेल.
आंध्र प्रदेशात जन्मलेले थोटाकुरा यांनी एम्ब्री-रिडल एरोनॉटिकल विद्यापीठातून उच्च शिक्षण पूर्ण केले. ते वैमानिक असून, ‘प्रीझर्व्ह लाइफ’ या कंपनीचे ते सहसंस्थापक आहेत. आरोग्याशी संबंधित असणाऱ्या या कंपनीचे मुख्यालय अमेरिकेतच आहे. त्यांना व्यावसायिक विमाने उडवण्याचा अनुभव असून, आंतरराष्ट्रीय वैद्यकीय वैमानिक म्हणूनही त्यांनी काम पाहिले आहे.