जेवणात मीठ जास्त पडतंय का ? मार्केटमध्ये आला इलेक्ट्रिक चमचा, फायदे ऐकून तुम्हीही व्हाल चकित

टोकयो : सध्या तंत्रज्ञान इतकं पुढे गेलं आहे की जवळ जवळ सगळ्याच गोष्टी आता इलेक्ट्रिकच्या रूपात मिळू लागल्या आहेत. आपण दात घासण्यासाठी जो टुथब्रश वापरतो तो सुद्धा आता इलेक्ट्रिकच्या रूपात आला आहे. अशातच आता सोशल मिडियावर एक व्हिडिओ व्हायरल होतोय. ज्यामध्ये इलेक्ट्रिक एक चमचा असून तो जेवणात असणाऱ्या मिठातील सोडियमचे अतिरिक्त प्रमाण कमी करण्यास मदत करणार आहे.

किरिन होल्डिंग्स कंपनीने तयार केला चमचा

जपानच्या किरिन होल्डिंग्स नावाच्या कंपनीने हा इलेक्ट्रिक चमचा तयार केला आहे. त्यांच्या म्हणण्यानुसार हा चमचा आरोग्यासाठी लाभदायक असून जेवणात वापरल्या जाणाऱ्या मिठातील सोडियमचे प्रमाण कमी करतो. ज्यामुळे जेवण निरोगी राहते. त्याच बरोबर जेवणाची चव कुठेही कमी होणार नसल्याचे देखील कंपनीकडून सांगण्यात आले आहे.
पापुआ न्यू गिनीमध्ये भूस्खलन, ६७० हून अधिक लोक मातीच्या ढिगाऱ्याखाली दबले, संयुक्त राष्ट्राची माहिती

१०,५०० रु असणार चमच्याची किंमत

कंपनीने दिलेल्या माहितीनुसार हा इलेक्ट्रिक चमचा लवकरच बाजारात येणार असून तो १९८०० येन इतक्या किंमतीत मिळणार आहे. भारतीय चलनानुसार जर बोलायच झालं तर १०,५०० रु मध्ये ग्राहकांसाठी उपलब्ध होणार आहे. कंपनीच्या म्हणण्यानुसार येत्या ५ वर्षांत एकूण १ दशलक्ष ग्राहकांपर्यंत पोहोचण्याचा त्यांचा उद्देश आहे.

प्लास्टीक, धातूचा वापर करून चमच्याची निर्मिती –

सुरवातीला हा इलेक्ट्रिक चमचा फक्त जपानमध्ये विकला जाणार असून पुढच्या वर्षापासून इतर देशांमध्ये त्याची विक्री सुरू होईल. हा चमचा प्लास्टिक व धातूचा वापर करून तयार करण्यात आला आहे. तसेच हा चमचा बनवण्यासाठी जपानच्या मेजी विद्यापीठात अध्यापन करणाऱ्या प्रोफेसर होमी मियाशिता यांची देखील मदत घेण्यात आली आहे.