मराठी चित्रपटांचा बॉक्स ऑफिसवर कल्ला! ‘जुनं फर्निचर’ ते ‘नाच गं घुमा’; वीकेंडला झाली घसघशीत कमाई

मुंबई– गेल्या २ आठवड्यात काही मराठी चित्रपट प्रेक्षकांच्या भेटीला आले आहेत. अगदी निवडणुका आणि इतर काही कारणांमुळे जिथे बॉलिवूड निर्मात्यांनी त्यांचे चित्रपट प्रदर्शित न करण्याचा निर्णय घेतला तिथे मराठी चित्रपट मात्र मोठ्या दिमाखात चित्रपटगृहात उतरले. आणि फक्त उतरलेच नाहीत तर ते त्यांची सत्ताही गाजवताना दिसतायत. १ मे रोजी मे रोजी अभिनेत्री मुक्ता बर्वे व नम्रता संभेराव यांचा ‘नाच गं घुमा’ प्रदर्शित झाला. या चित्रपटाची प्रेक्षकांमध्ये प्रचंड चर्चा होती. हा चित्रपट प्रेक्षकांच्या पसंतीस पडत आहे. या चित्रपटाच्याबरोबर ‘स्वरगंधर्व सुधीर फडके’ हा चित्रपटही प्रदर्शित झाला. या चित्रपटालादेखील प्रेक्षकांचा चांगला प्रतिसाद लाभत आहे. तर महेश मांजरेकर यांचा ‘जुनं फर्निचर’ हा चित्रपटही प्रेक्षकांच्या पसंतीस पडत आहे. आता या आठवड्यात या चित्रपटांनी किती कमाई केली आहे हे पाहूया.

महेश मांजरेकर दिग्दर्शित ‘जुनं फर्नीचर’ या चित्रपटाने पहिल्या आठवड्यात ३ कोटी ७ लाखांची कमाई केली होती. त्यानंतर ‘नाच गं घुमा’ प्रदर्शित झाला. मात्र तरीही ‘जुनं फर्निचर’ची घौडदौड सुरूच आहे. या चित्रपटाने दुसऱ्या आठवड्यात आणखी २ कोटींची कमाई केली आहे. या चित्रपटाचं एकूण कलेक्शन हे ५ कोटी ७७ लाख आहे. सॅकनिक या वेबसाईटने ही माहिती दिली आहे. तर दुसरीकडे परेश मोकाशी दिग्दर्शित ‘नाच गं घुमा’ या चित्रपटाने प्रेक्षकांना वेड लावलंय. या चित्रपटाने पहिल्याच दिवशी २.१५ कोटी, दुसऱ्या दिवशी ८० लाख, तिसऱ्या दिवशी ९५ लाखांची कमाई केली. तर गेल्या वीकेंडला या चित्रपटाच्या कमाईत चांगलीच भर पडली. वीकेंडला या चित्रपटाने ३.९० कोटी कमावले असून पाच दिवसांची एकूण कमाई ही ५.७५ इतकी आहे. सगळीकडेच या चित्रपटावर कौतुकाचा वर्षाव होत आहे.

नाच गं घुमा या चित्रपटात मुक्ता बर्वे, नम्रता संभेरावसह सुप्रिया पाठारे, सुकन्या मोने व मायरा वायकुळ यांच्यासह सारंग साठ्ये यांच्या प्रमुख भूमिका आहेत. तर स्वप्नील जोशी व शर्मिष्ठा राऊत यांनी या चित्रपटाच्या निर्मितीची धुरा सांभाळली आहे.