महिलांनी बोलण्यात गुंतवलं पण दुकानदाराला संशय; तेवढ्यात बॅगेतून पेंडंट पडलं आणि बिंग फुटलं

लखनऊ : दुकानात सोन्या-चांदीचे दागिने घेण्यासाठी गेलेल्या महिलांनी दुकानात हजारोंचा डल्ला मारला. चोरट्या महिलांनी ७१ हजार ३९२ रुपयांचे सोन्याचे दागिने लंपास केले. महिलांनी दागिने लंपास केल्याची बाब सराफा व्यापाऱ्याच्या लक्षातही आली नाही. त्यानंतर मालाची जुळवाजुळव करताना सराफा व्यापाऱ्याला संशय आल्याने त्याने महिलांची कसून चौकशी केली. त्यावेळी महिलांकडून पळवलेले सोन्याचे दागिने जप्त करण्यात आले. तातडीने व्यावसायिकाने पोलिसांना याबाबत माहिती दिली. पोलिसांनी घटनास्थळ गाठून महिला चोरट्यांची चौकशी सुरू केली.

महोबा मुख्यालयात असलेल्या सराफा मार्केटमध्ये शनिवारी महिला चोरट्यांनी सराफा दुकानाला टार्गेट करून सोन्याचे दोन पेंडल लंपास केले. सराफा व्यापारी राकेश कुमार सोनी यांनी सांगितलं की, तीन महिला दुकानात आल्या आणि सोन्याचे दागिने घेण्यासाठी पेंडल दाखवण्याचं म्हणाल्या. पेंडल दाखवल्यानंतर त्यांनी आणखी दागिने दाखवायला सांगितले. हे पाहत असतानाच काही वेळात आणखी दोन महिला आल्या आणि चांदीच्या जोडवी खरेदी करण्याबाबत बोलू लागल्या.
गर्दीमुळे कुणी दरवाज्यातून बाहेर, कुणी खांबाला धडकलं; रेल्वेतून पडून तिघांचा मृत्यू; दिवा ते उल्हासनगर दरम्यान घटना
महिलांना जोडवी दाखवत असताना, सोन्याचे दागिने पाहणाऱ्या महिलांनी अंदाजे ७१, ३९२ रुपये किमतीचे दोन सोन्याचे पेंडल लंपास केले आणि दुकानातून पटकन पळण्याचा प्रयत्न सुरू केला. त्यावेळी सराफा व्यवसायिकाला संशय आल्यावर त्याने त्याच्याकडे असलेल्या पेंडलच्या बॉक्सचं वजन केलं. बॉक्सचं वजन जवळपास ९.५ ग्रॅमने कमी असल्याचं आढळून आलं. त्यानंतर महिलांची चौकशी केली. चौकशीवेळी एका महिलेकडून एक सोन्याचं पेंडल खाली पडलं आणि दुकानदाराचा संशय खरा ठरला. त्यानंतर घटनास्थळी लोकांची गर्दी झाली.
कारमध्येच चिमुकलीला विसरले, काही तासांनी लक्षात आलं पण.. आई-वडिलांची एक चूक आणि सारं संपलं

पोलिसांची दिशाभूल करत होत्या महिला

माहिती मिळताच कोतवाली पोलिसांच्या महिला निरीक्षकांनी घटनास्थळ गाठून पाच जणांची चौकशी करून माहिती मिळवली. पोलिसांनी पाच महिलांना ताब्यात घेऊन चौकशी सुरू केली आहे. भरदिवसा चोरीच्या घटनेने सराफा व्यापाऱ्यांमध्ये भीतीचे वातावरण निर्माण झालं आहे.

पोलीस आजूबाजूच्या सीसीटीव्ही कॅमेऱ्यांवरून संपूर्ण घटना समजून घेण्याचा प्रयत्न करत आहेत. नाव आणि पत्ता विचारल्यावर महिला सतत वेगवेगळी तसंच चुकीची माहिती देत पोलिसांची दिशाभूल करण्याचा प्रयत्न करत आहेत.