मिळालेल्या माहितीनुसार, काळे कपडे घातलेले चोरटे हातात शस्त्रे घेऊन पीएनजी ज्वेलर्सच्या दुकानात घुसले. दुकानाच्या खिडक्यांच्या काचा फोडल्या. त्यानंतर सोने घेऊन पळून गेले. चोरट्यांनी अवघ्या काही मिनिटांतच हा गुन्हा केला असून घटनास्थळी लावलेल्या कॅमेऱ्यात हा संपूर्ण प्रकार कैद झाला आहे. तो आता व्हायरल होत आहे. सीसीटीव्ही फुटेजमध्ये असे दिसून आले आहे की दरोडा दुपारी १२:३० च्या आधी घडला होता. चोरट्यांनी डिस्प्ले केसेस फोडण्यासाठी आणि मौल्यवान दागिने चोरण्यासाठी हातोडा आणि साधनांचा वापर केला होता. फुटेजमध्ये, काळे कपडे घातलेले संशयित El Camino Real येथे असलेल्या PNG ज्वेलर्समध्ये घुसले.
वृत्तानुसार, ही घटना E. El Camino Real वरील Hacienda Shopping Center येथे दुपारी घडली. संशयितांनी दागिन्यांच्या दुकानात घुसण्यासाठी स्लेजहॅमर आणि साधनांचा वापर केला आणि मौल्यवान वस्तू चोरल्या. पोलीस येण्यापूर्वी वाहनांमध्ये बसून पळून गेले. अहवालानुसार, DPS ने प्रेस रिलीजमध्ये म्हटले आहे की, त्यांनी उत्तरेकडील यूएस हायवे १०१ वर दोन संशयित वाहने शोधून काढली. पाठलाग करताना, चोरीचे दागिने एका वाहनातून फेकले गेले. जे नंतर रेडवुड शहरातील व्हिपल अव्हेन्यू जवळ टाकून दिले. पाच संशयित औद्योगिक परिसरात पळून गेले आणि त्यानंतर त्यांना सॅन कार्लोसजवळ अटक करण्यात आली. नेवार्कमधील भिंडी ज्वेलर्समध्ये अशाच प्रकारची घटना घडल्यानंतर, गेल्या दोन आठवड्यांतील भारतीय ज्वेलरी स्टोअरला लक्ष्य करण्याचा हा दुसरा दरोडा आहे.
या प्रकरणी वाहनात असलेल्या पाच संशयितांनी फ्रीवे ओलांडून जवळच्या औद्योगिक परिसरात पळून जाण्याचा प्रयत्न केला. इंडस्ट्रियल रोडजवळून चार संशयितांना ताब्यात घेण्यात आले. चोरीचे काही दागिने जप्त करण्यात आले आहेत. चोरीला गेलेल्या दागिन्यांची एकूण किंमत अद्याप समजू शकलेली नाही. लुटमारीत कोणीही जखमी झाले नाही.