बॉक्स ऑफिस कलेक्शन किती?
संघर्षयोद्धा मनोज जरांगे पाटील या सिनेमाच्या कमाईबद्दल बोलायचं झालं तर प्रदर्शित होऊन सहा दिवस झाले आहेत आणि या सिनेमानं ५० लाखांच्यावर कमाई केली आहे.
सिनेमांच्या कमाईचे आकडे देणाऱ्या sacnilk.com या संकेतस्थळानुसार संघर्षयोद्धा मनोज जरांगे पाटील या सिनेमानं ओपनिंगच्या दिवशी म्हणजे पहिल्या दिवशी आठ लाखांचा गल्ला जमवला होता. तर दुसऱ्या दिवशी सिनेमाची कमाई ही ९ लाख इतकी होती. तर तिसऱ्या दिवशी सिनेमाच्या कमाईत वाढ झाल्याचं दिसून आलं होतं. तिसऱ्या दिवशी सिनेमानं तब्बल १६ लाखांची कमाई केली. यानंतर कमाईत वाढ होईल, असं वाटत होतं मात्र तसं झालं नाही. पुन्हा सिनेमाच्या कमाईत घट झाली. चौथ्या दिवशी सिनेमाची कमाई ही नऊ लाख इतकी होती. तर पाचव्या दिवशी सिनेमानं केवळ चार लाखांचा गल्ला जमवला. तर सहाव्या दिवशीही सिनेमानं चार लाखांचीच कमाई केली. त्यामुळं सिनेमाची एकूण कमाई ही आता ५० लाख इतकी झाली आहे.
निर्मात्यांचं आवाहन
सिनेमाची कमाई म्हणावी तशी होत नसली तरी, संघर्षयोद्धा मनोज जरांगे पाटील सिनेमाच्या निर्मात्यांनी प्रेक्षकांना भावनिक आवाहन केलं आहे. या सिनेमातून मिळणारा नफा हा समाजासाठी देण्यात येणार असल्याचा मोठा निर्णय त्यांनी जाहीर केलाय. सिनेमतून मिळणारा पैसा मराठा समाजासाठी वापरण्यात येणार असल्यानं सिनेमा जास्तीत जास्त लोकांपर्यंत पोहोचवा, पाहा..असं त्यांनी म्हटलं होतं.
‘आम्ही जरांगे’ सिनेमाचीही चर्चा
तर मराठा आरक्षण आणि मनोज जरांगे पाटील यांच्यावर आधारित आणखी एक सिनेमा प्रेक्षकांच्या भेटीला येणार आहे. संघर्षयोद्धा मनोज जरांगे पाटील आणि आम्ही जरांगे या दोन्ही सिनेमांचे विषय सारखे असल्यानं आता ‘संघर्षयोद्धा’ सिनेमाच्या कमाईत आणखी घट होऊ शकते.
बॉलिवूड सिनेमांशी स्पर्धा
खरं तर बॉक्स ऑफिसवर सध्या मोठे बॉलिवूड सिनेमेही स्पर्धेत असल्यानं मोठ्या शहरांमध्ये थिएटर मिळवण्यासाठी मराठी सिनेमांना संघर्ष करावा लागत आहे.